Petronas terus chakah bejalaika program CSR nyaup pemansang
BINTULU: Petronas terus chakah bejalaika program tanggungpengawa rama korporat (CSR) ba bidang pelajar, pemansang komuniti enggau rampa menua nyengkaum ngemansangka raban nembiak bepenau ba pengawa nentuka pemansang menua terus tegap.
Entara pengawa dipejalai nengah program Outreach ti udah dilanggur sepanjai taun baka pengawa ngaga lupak pejalai kaki enggau endur nganti beperabung ungkup bala nembiak ba Sekula Primari (SK) Kidurong 2.
Ketuai Pemesai Eksekutif Malaysia LNG Sdn Bhd (MLNG) Ir Pau Kiew Huai madah pengawa ngaga lupak pejalai kaki beperabung mega ngaul kerejasama bakih serikat kami Dayang Enterprise Holdings Berhad, Kemudi Harta Sdn Bhd enggau Persafe Engineering Sdn Bhd kenyau ari bulan March taun tu.
“Aku dipadah sebedau tu, sida nembiak mansang enggau pulai ari sekula ngelaban panas enggau ujan, sida nadai endur ngenduh nganti apai indai tauka orang ti ngibun ngambi sida pulai pengudah jam sekula,” ku iya ba pengawa bejadika projek dipenyadika Sekretari Mendam Opis Menteri Pelajar, Sains enggau Pansik Teknologi Datu Sudarsono Osman ba SK Kidurong 2, apin lama ke udah.
Nya kebuah ku iya, sida ngarap pengawa ngaga lupak pejalai kaki beperabung tu, rampa ngelingi sekula deka likun agi enggau lantang ungkup bala nembiak, bisi 973 iku, enggau bala pengajar sereta deka ngemuntangka pengawa apai indai ngan- jung enggau ngambi bala anak sida ngagai enggau ari sekula nya.
Kelimpah ari nya ku iya, raban volunteer kami mega ngatur renggat aktiviti belajar ti ngerinduka ati ungkup 140 iku nembiak dikena nempa pengandal enggau semengat pemansang beraban ngagai bala nembiak ti diperati sida chakah ngaul diri.
Beserimbai enggau pengawa ngintu genap taun ke40 MLNG ku iya, raban sida mega udah nanam 120 pun kayu ngelingi sekula nyadi sebagi ari program ti dilangkar sida ungkup taun tu sereta nentuka rampa kelingi gadung ba Bintulu kelebih agi ba kandang sekula.
Berebak enggau nya ku Sudarsono, infrastruktur sekula ti meruan enggau likun ti digaga ungkup nembiak deka meri pemaik ngagai sida maya belajar.
Iya muji Petronas nengah anak serikat iya MLNG laban bejalaika program baka nya sereta ngaul diri ba mayuh program mantu bala nembiak enggau sekula ba nengeri tu kelebih agi nambahka pemansang sekula ba kandang menua pesisir enggau mengeri.
Ku iya, opis menteri iya mega deka seruran bekerejasama enggau Opis Pelajar Nengeri Sarawak nentuka sekula meruan enggau likun sereta mantu ngenegapka bala pengajar seriris enggau peminta kemaya hari ari suku nyadi ketuai enggau ngatur pengawa sekula.
Iya madahka pengawa Petronas ngatur beberapa aktiviti dipelanja serikat nya antara iya Program Sentuhan Petronas dikena mantu bala nembiak ba nengeri tu nyengkaum projek bekaul pengawa ngintu rampa menua asal enggau ke bukai nyadi inisiatif pemadu manah enggau nemban ba pemansang komuniti enggau rampa menua ba Sarawak.
Sama datai Pemesai Pelajar Pelilih Bintulu Fred Entau, Kepala Pengajar SK Kidurong 2 Afendi Soon, Chairman Serakup Apai Indai enggau Pengajar (PIBG) SK Kidurong 2 Nor Rigis, Sapit Residen Bagi Menua Bintulu Hussaini Hakim sereta bala bukai.