Tentuka pengamat kebuah penusah meletup nyadi ba CityONE
KUCHING: Opis Pengelikun enggau Pengerai Pengereja sereta raban ejensi bekaul diansak bejalaika pansik sida enggau jampat ba penusah meletup ba Palan Bebelika Barang CityONE kena Hari Dua tu tadi.
Menteri Kereja Raya, Baru Bian madah, tu dikena nentuka sekalika bisi sebarang pengawa ngelanggar prosedur pengelikun enggau atur pengawa ngemanah dipejalai tekala nya.
“Aku tekenyit ninga berita pasal penusah meletup ba CityONE kena Hari Dua tu tadi sereta sinu pengudah nemu penusah tu nabanka tiga nyawa pekereja enggau lebih 40 iku bakal.
“Ari nya, aku sinu meda sida sebilik enggau niang ti ditinggal midang. Aku meda dipadah sebagi ari sida balat bakal lalu besampika sida tu deka pulai gerai baka selama,” ku Baru ba penerang berita kemari.
Ku Baru, iya enggai ngenang silik pasal pun penusah enggau isu bekaul laban pansik benung dipejalai.
“Pekara ti deka disebut aku, lebuh ngaga kereja begunan baka berumah enggau ngubah langkar, kunterikor mesti nentuka bala pekereja dilatih enggau bisi penau gawa,” ku iya.
Ba pekara tu ku iya, Kaunsil Pemansang Industri Begaga ari baruh Akademi Binaan Malaysia (ABM) patut bejalaika pengawa.
“ABM nyendiaka mayuh kus pasal pengelandik vokasional enggau teknikal lalu nya kebuah aku meransang raban nembiak enggau bala pekereja rejista ba program tu dikena nambahka pengelandik sida.
“Bala kunteriktor mega diperansang nganjung bala pekereja sida dilatih enggau diaku. Ari chara tu, kitai ulih nambahka tikas pengelandik pekereja lalu nikika standard industri berumah kitai,” ku iya.
Berebak enggau nya, Baru muji raban nyaga pengelikun enggau mensia mayuh ti sikar gawa mantu sida ti bakal enggau tepekul dalam begunan runtuh pengudah meletup.
“Sinu amat meda mensia mayuh nejuka pengirau sida mantu raban ti bakal ba penusah tu sebedau raban nyaga pengelikun datai ngesah,” ku iya.