Pemujur ngatur Pengawa Bejalai Bebala Mayuh Krismas ngelama tu ngemegahka Mengeri Miri
MIRI: Miri tau ngemegahka diri empu nyadi semina siti aja mengeri di menua tu ke bisi Bejalai Bebala Mayuh Krismas ti diatur begulai raban gerija enggau Majlis Bandaraya Miri (MCC) kenyau ari pengawa bejalai bebala mayuh nya berengkah diatur dalam taun 2008.
Datuk Bandaraya, Adam Yii madahka mengeri baka Kuching, Sibu enggau Bintulu, Bejalai Bebala Mayuh Krismas sida diatur siti gerija aja.
“Tu jaku penetap diberi Kaunsil Kandang Menua ngagai Serakup Gerija Sarawak.
“Reti nya, raban Kaunsil Mengeri ngelala pengawa kitai ngempung peranak Miri, kelebih agi raban Kristian enggau ti ukai Kristian. Aku nemu, ukai semina raban Kristen aja, tang mega sida ti ukai Kristian mega nganti pekara tu,” ku Yii ba aum pengarang berita kemari ungkup Bejalai Bebala Mayuh Krismas Bandaraya Miri 2018.
Yii ti nyadi Chairman Pengatur Begulai pengawa bejalai bebala mayuh mega nyemetak madahka Bejalai Bebala Mayuh Krismas Bandaraya Miri deka diatur kena Hari Enam, 8 Disember, iya nya pengerami ti patut disereta semua orang nadai ngira bansa enggau penemu politik.
“Nya kebuah Komiti Pengatur udah mantaika jaku tesau ngagai semua komuniti enggau bala ketuai politik, nyengkaum bala pengari rayat ari Pakatan Harapan enggau GPS. Kitai ngelaluka semua orang berami begulai enggau semua komuniti Kristian ba Mengeri Miri tu,” ku Yii.
Iya nyamin baru pengawa bejalai bebala mayuh deka terus dipejalai taja berujan baka taun nyin tadi.
“Kitai deka ngerembaika pesan ngagai mensia mayuh, nadai ngira harin ujan tauka kabut, baka ‘Noah’s Ark’ pasal penusah ampuh bah besai, pengasih Tuhan meruan enggau kitai, Jesus Kristus iya nya pemeri pengasih ari Serega, Iya tu Emmanuel, iya diau enggau kitai,” ku iya.
Nya alai, iya ngingatka semua penyereta nyikap diri ba pengawa bejalai bebala mayuh sereta begulai enggau ati lantang seraya nambah, fokus besai ba pengawa sehari nya ukai orang tauka program, tang Jesus Kristus ti kasihka semua kitai.
Yii mega ngingatka semua pesereta ngemeranka pengelantang (verchoo) nitihka jam. Nya alai, iya deka nentuka pengawa berengkah urung pukul 7 lemai.
Taun tu renggat ke- 11 Miri City Christmas Parade betuaika Gerija Methodist ti berambaika jaku ‘Heaven’s gift of Love’ diambi ari Jaku Injil, John Bab 3 genteran 16.
Ku Yii nambah, urung 45,000 raban Kristen ari 15 buah gerija di Miri dipelaba deka nyereta bejalai bebala mayuh, ti deka dipenyadika Sapit Kepala Menteri, Datuk Amar Douglas Uggah Embas.
Iya deka berengkah ari Miri City Fan nengah beberapa batang jalai ba mengeri lalu pulai baru ngagai City Fan.
Jalai ditengah deka ditutup amat rambau pengawa bejalai bebala mayuh ari pukul 5 lemai iya nya bulatan nuju Jalai Kipas ba mua Al-Taqwa Mosque, North Yu Seng Road ngagai Jalai Kipas (simpang SK Syed Othman), enggau simpang Jalai Unus ( jalai antara masjid enggau Komplek Perintah Besai).
Tujuh jalai deka ditutup berenggat – Jalai Sylvia, Jalai Brooke, Jalai Kingsway, Jalai Cina, Jalai Bendahara, Jalai North/South Yu Seng, Jalai Merpati enggau Jalai Kipas/ Miri City Fan.
Ku Yii, program deka dipunka enggau jaku puji enggau sembah ari Roman Katolik, ditangkanka enggau pengawa bejadika ke alai deka bisi Jaku ajar ari Presiden Methodist Rev Dr. Tie King Tai, ditangkanka jaku ari Chairman Pengatur Begulai, Rev Tan Chung Kiat, Mayor Yii sereta temuai dipebasa, Uggah.
Pengawa ngelepas bejalai bebala mayuh ditimpuh urung pukul 7 lemai lalu udah nya ba Miri City Fan deka bisi lima pemerindang nyengkaum tanda ‘prophetic’ enggau choir ari mayuh bengkah gerija.
Mega deka bisi pemerindang ba jalai sepanjai Jalai Kingsway ba mua MCC, Jalai Nahkhoda Gapar ba mua Sin Liang supermartket enggau ba Jalai Datuk Merpati – ba mua Permaisuri Imperial Mall.