LAKU ngerikod untung sebedau chukai sepenyampau RM9.85 juta ba 2017
MIRI: LAKU Management Sdn Bhd (LAKU) ngerikod untung sebedau chukai penyampau RM9.85 juta dalam taun 2017 iya nya nambah ari penyampau RM7.60 juta dalam taun 2016.
Tu ditemu audit belalauka Laporan Ketua Audit Negara 2017 (LAN 2017) Siri Dua.
Nitihka ripot nyad, Laku ngerikod gaya niki ba untung terkumpul iya nya penyampau RM152.78 juta dalam taun 2015, RM155.99 juta dalam taun 2016 enggau RM164.58 juta dalam taun 2017.
“Analisis Audit ba bida kemaya tu LAKU ba pengawa mansik tikas ‘kecairan syarikat’ nunjukka dalam taun 2017 tikas ‘kecairan’ LAKU nambah ngagai 1.60:1 dibida 1.51:1 dalam taun 2016.
“Tu nunjukka LAKU ulih mayar utang dalam timpuh pandak. LAKU mega sikar ngatur asset dikena ngulihka untung enggau asil penyampau RM2.60 ba tetiap ringgit aset diperanak,” ku ripot nya.
Kelimpah ari nya, LAKU bisi laluh enggau ‘kesetaraan tunai’ penyampau RM88.27 juta dalam taun 2017.
Seraya ari sukut pengawa ngatur aktiviti LAKU sikar enggau pemansut ke amat ti dijapai, bekal enggau ai beresi dijual ngelui ari 90% dalam taun 2015 nyentuk 2017.
“Pengawa ngintu barang kimia LAKU digaga enggau komited berindik ari pengawa ngulihka barang nya, nyimpan enggau pengawa ngena barang kimia nya.
“Taja pia, pengawa ngintu ai ti nadai asil (Non-Revenue Water - NRW) enda entu meruan enggau nunjukka gaya nambah dalam timpuh ti sama,” ku ripot nya nerang.
Tikas NRW LAKU nun- jukka gaya nambah ari taun 2015 nyentuk 2017 bela ba ikas 24.3 peratus, 25.5 peratus enggau 26 peratus.
“Penyampau isi padu ai ti lenyau ba taun 2015 nyentuk 2017 antara 28.32 juta m³ enggau 31.56 juta m³. Ba timpuh tu, ungkus mansutka ai ti ditanggung LAKU ngaul ai lenyau penyampau RM54.31 juta.
“Kuantiti enggau ungkus ngeluar nunjukka gaya niki ba timpuh sama iya nya ari 28.32 juta m³ ngaul belanja pengeluar penyampau RM16.71 juta dalam taun 2015 ngagai 31.56 juta m³ enggau ungkus ngeluar manggai RM18.93 juta,” ku ripot nya.
Ripot mega merambu ngambika LAKU bejalaika pengawa proaktif agi dikena mutarka gaya niki kadar NRW nentuka rugi ba pekara belanja ngeluar ba tikas minimum.