Orang dagang di Bintulu patut ngerembaika dagang dalam industri minyak enggau gis
BINTULU: Raban orang dagang di Bintulu patut ngerebut awak enggau nambah sereta ngerembaika dagang sida dalam industri minyak enggau gis berindik ari pengelebih Bintulu ti ngembuan gis iya nya 50 trilion standard cubic feet (Tscf) lalu bisi nyimpan minyak 0.8 bilion tong di luar nebing pantai nya ditu.
D i r e k t o r M a j l i s Amanah Rakyat (MARA) Nengeri Sarawak Dr Azmi Amat Murjan madah, ari MARA sida udah mantu nengah perengkaguna ekosistem, duit jali, pengawa latih, palan enggau servis kaunseling sereta mindahka teknologi dikena mantu orang dagang dalam industri nya.
Berindik ari nya, tu nitihka pengeransing orang dagang dalam bidang nya empu ngelangkar pengawa dagang sida ngambika terus ngerembai daam industri ti bekaul.
Nengah pemisi Bintulu ti nyadi loji gis asal ai ti besai di dunya iya nya Malaysia LNG (MLNG), ku iya madah, nya udah ngasilka penatai pemisi ngagai perintah nengeri Sarawak ke mega nengah penumbuh Petroleum Sarawak Berhad ( PETROS) sereta Palan Pengelandik MARA (IKM) BIntulu deka nempa modal mensia ti endang diguna dalam industri minyak enggau gis di Bintulu.
“Kebendar nya, IKM Bintulu udah meri pengawa latih enggau embing dikena nambahka kapasiti sereta tikas pengulih orang dagang di Bintulu,” ku iya madah dalam jaku pengelalu iya di pengerami ‘ Smoke House Training Package’ ke dibacha Mandal DIrektor (Pekara Orang Dagang) MARA Dato’ Zulfikri Osman di IKM Bintulu kemari.
Nya alai, nengah penyereta 29 buah kompeni enggau 35 pesereta dalam woksyop nya kemari, deka ngerpitka kaul ti rat agi lalu mantu bala orang dagang ngambika ngerebut awak nya kelebih agi maya pengawa licha ti diatur bekaul enggau peluang dalam industri minyak enggau gis.
Ku iya madah, MARA di nengeri tu bisi 34 palan latih enggau 364 premis dagang sereta udah ngemansangka 3,400 orang dagang kelebih agi di Bintulu enggau mekuh ngagai sekeda kluster entara nya dalam industri minyak enggau gis.