Perintah nengeri dekaka rayat beserakup enda ngira jalai pengarap
MARUDI: Perintah nengeri Sarawak udah ngaga semua pekara ti patut dikena nentuka penyerakup dalam mayuh jalai pengarap deka diteruska ninting maya. Tiap iku rayat di nengeri tu endang dijamin nadai penanggul ngemeranka jalai pengarap nitihka ti dipechaya sida.
“Komitmen tu ukai semina jaku aja ari ketuai di renggat perintah nengeri tang mega udah sama dibantu ari Unit for Other Religion (UNIFOR), sebuah unit ti udah ditumbuhka ari baruh Opis Kepala Menteri lalu betuaika Sapit Kepala Menteri Datuk Amar Doughlas Uggah Embas ke mega Menteri Betanam Betupi Moden, Tanah Adat enggau Pemansang Kandang Menua Sarawak kenyau ari dua taun ti udah lalu udah nyadi nengeri ti keterubah di selampur Malaysia ti ngembuan langkar pemansang ti dikemerat sereta agenda dikena nentuka semua palan besembiang seruran dijaga.
“Ungkup Gerija Sidang Injil Borneo The Time, aku ulih meda Petara endang nyata udah mantu sida ke buta dalam pekara jalai pengarap. Pemisi gerija tu udah meri awak ngagai sida ke buta kelebih agi baka di Kuching ti udah bisi palan endur besembiang ti enda ngira penangi,” ku Kaban Kunsil Nengeri ( ADUN) Telang Usan lebuh ti bejadika Pengerami Betemu Baru enggau Mantar Krismas BEM The Time, ditu, bedau lama.
Gerija tu udah ditumbuh kenyau ari taun 2003 nengah Kaban BEM Sarawak ti berundingka patut bisi siti palan endur besembiang ti ulih ngempung kaban gerija kelebih agi sida ke buta.
Dennis mega meransang sida ti nyelai pendiau madahka sida mega dipeda Petara ukai nitihka pengurang, nya alai sida patut bebasaka jaku Iya lalu sida deka meda berekat Petara ba pemisi sida.
“Kita orang ti menyana di mata Petara. Teruska enggau pengarap kita dalam Petara,” ku iya.
Dennis mega muji ketuai enggau kaban BEM The Time ke sanggup bejalaika tanggungpengawa dalam jalai pengarap nengah mayuh macham pengawa gerija kenyau ari nya ditumbuh 12 taun ke udah.
“Aku endang andalka chara kita bejalaika pengawa Petara lebih ari semua utai. Aku mega udah ninga mayuh pengawa udah digaga kita ungkup kaban gerija tu ari Pastor Lawai ti udah numbuhka gerija tu, lalu aku semina ulih nyimpul sereta beterima kasih ngagai Petara bisi mega orang baka kita dalam komuniti tu.
“Nengah penyereta mayuh raban nembiak ti udah mantu kaban ti sama bisi. Tu mega deka nyadi sebagi ari pelajar dalam pengidup,” ku iya nambah.
Iya mega meransang kaban BEM Sarawak sereta mensia mayuh meri sukung ti besai ngagai Gerija BEM The Time dikena nentuka pemansang gerija tu ti ulih ngaul mayuh agi pengidup di luar.
Kelimpah ari nya, iya mesan sida ti bejalaika tanggungpengawa nyadi ketuai dalam gerija tu endang orang ti dipilih Petara.
“Petara meda mayuh pemanah dalam kita ti ulih mantu orang bukai entara kita lalu tu mih udah ngayanka kitai pengawa jalai pengarap ulih digaga enda ngira pendiau diri laban ulih mega ngenataika diri ngagai gerija besembiang enggau nadai penanggul,” ku iya siru.
Urung 100 iku kaban udah datai ngulu pengerami tu nyengkaum Pastor Peter Lawai, ex- Senator Ding Seling, Chairman Pengatur Gerija James, bala pastor enggau ex-kaban gerija nya ti datai ari Kapit, Miri enggau Bintulu.
Rambau pengerami nya, Dennis udah ngemendarka geran Projek Mit Menua Pesisir (MRP) sepenyampau RM7,000 ungkup bejalaika aktiviti gerija semanjai taun.