Pengerindu macha patut dikemeran berengkah ari nembiak agi mit
SARIKEI: Ulah ngemeranka pengawa macha beguna amat ba pengawa belajar seumur idup lalu pengelandik tu patut dikemansang berengkah ari anak mit ada.
Ketuai Pemesai Eksekutif Pustaka Nengeri Sarawak, Dr Rasidah Bolhassan madah, kebuah pia, makin mayuh nembiak mit macha, sida deka majak bisi agi pengandal napi pemar idup dudi hari.
“Nya alai, Pustaka Nengeri Sarawak udah ngelancharka beberapa program dikena nyapai juluk tu.
“Dulu ari nya, program ‘Born To Read’ udah berengkah dilanchar kenyau ari taun 2004 enggau tuju meransang literasyen tumu semengat belajar ngagai bala nembiak mit.
“Pengawa tu udah mujur meri empas positif lalu nampung program nya, Pustaka Nengeri Sarawak udah ngelancharka program ‘Reading Seeds’,” ku iya.
Dr Rasidah mansutka jaku nya rambau Pengawa Nyuaka Kit Reading Seeds diatur Pusaka Nengeri Sarawak enggau kerejasama Opis Residen Bagi Menua Sarikei,ensanus.
Program udah diatur ba Palan Inovasyen Sarikei (SIC) lalu udah digulu urung 200 iku penyereta datai ari bala nembiak mit, apai indai enggau mega raban indu ti deka nyadi indai.
Nitih ku Dr Rasidah, kit bacha ngundan bup anak mit ti dilangkar khas enggau bacha manual ungkup apai indai enggau penerang pasal librari besemak ke alai apai indai tau minta sukung tauka bantu.
“Pengawa meri kit tu manah amat sereta patut dikena meransang apai indai nerenakka ulah rindu macha ngagai bala anak ba renggat tumu.
“Pengawa matau tumu udah tetemuka bala nembiak mit ti ngulu program tu jampat mansang lalu teulihka pemutus nyulut ba sekula dibida nembiak ke bukai.
“Nya kebuah kitai ngara- pka program ti diatur meri mayuh pemaik ngagai bala nembiak mit ti deka nyadi tulang belakang menua jemah,” ku iya.
Sama datai rambau program nya Pemesai Pengerai Bagi Menua Sarikei, Dr Joseph Fong Tsung enggau Pengari Residen Bagi Menua Sarikei, Baijuri Bidin.