‘NeNe Chicken Malaysia’ deka mantu sida ti bebadi ba penusah meletup di CityONE
KUCHING: ‘NeNe Chicken Malaysia’ deka meri bantu ngagai ruang bilik sida ti bebadi nyawa enggau bakal ba penusah meletup di Palan Bebelika Barang CityONE Hari Dua tu tadi.
Penerang berita ari rentayan palan pemakai nya kemari mega minta mensia mayuh bebasaka sida niang sebilik ti kena tuntung penusah lalu enda naburka penerang bula bekaul enggau penusah nya.
NeNe Chicken Malaysia madahka raban sida diatu agi nganti ripot penuh penusah ti ngujungka tiga iku bebadi nyawa seraya 41 iku bakal.
Ku penerang berita nya nambah, NeNe Chicken Malaysia udah nemu pansik tumu tetemuka penusah nyadi ketegal utai meletup.
“Kami bekerejasama enggau kedai bisi lisin kami ba CityONE enggau raban Palan Bebelika Barang CityONE lalu deka meri kerejasama tegut ngambika mantu sida ti kena pangka serta mantu pansik,” ku iya.
Berindik ari nya NeNe Chicken Malaysia ngenataika jaku sinu ngagai sida niang tiga iku nya sebilik ti bebadi nyawa ba penusah nya.
“Kami sinu amat ngenang nasit ti ditapi sida ti bebadi nyawa sereta sida ti bakal. Kami besampika sida ti sebilik enggau niang ti bebadi nya.”
Nitihka penerang mega, diri sebilik ti besemak enggau sida udah dipadah pasal gaya penusah sida lalu deka seruran ngulihka penerang pemadu baru berindik ari pansik agi dipejalai.
Pansik tumu tetemuka gis meletup nyadi ba palan pemakai nya lebuh kereja ‘ welding’ benung digaga.
Seraya Sapit Kepala Polis Sarawak Datuk Mihd Dzulraidi Ibrahim rambau aum pengarang berita ba endur penusah nyadi pagi kemari madahka penusah meletup ba Palan Bebelika Barang nadai ngaul pengawa salah ke bukai.
Iya madahka pansik naka diatu tetemuka penusah nya nyadi ketegal penusah nyengit.
“Pansik udah dipejalai lalu kitai tetemuka penusah meletup tu nyadi kemari nadai elemen tauka bisi pengawa ti sengaja digaga.
“Pia mega raban penasat bela tetemuka nadai elemen militan,” ku iya madah ngagai pengarang berita.
Ku iya, tiga lelaki ti bebadi nyawa ba penusah nya dikumbai mati ngenyit ( SDR).