Bangkai siku lelaki ti udah but bisi ditemu ba rumah lama di Jalai Green
SARIKEI: Niat siku lelaki deka ngenduh ari ujan ba sebuah rumah temawai di Jalai Green lemai kemari, ngujungka iya tetemuka bangkai siku lelaki ti udah but enggau benchit.
Ketuai Polis Pelilih ( KPD) Sarikei, Superintenden Awang Alfian Awang Bujang madahka bangkai nya udah ditemu urung pukul 5.30 lemai.
“Belalauka penerang ari lelaki nya, lebuh iya ngenduh ba rumah temawai nya, iya bisi nyium utai bau but ari kandang begunan nya.
“Laban deka nemu silik agi ari ni penatai bau but nya, lelaki nya udah bejalai sebelah endur dia lalu tetemuka bangkai mensia ti nyau gentung enggau benchit ba dalam rumah nya.
“Tebamba meda utai baka nya, iya lalu telefon nuju polis,” ku iya ba penerang berita, kemari.
Pengudah nerima ripot nya, seraban raban polis diketuaika Ketuai Bagi Pekara Pansik Penyalah (KBSJD) Indu Opis Pelilih (IPD) Sarikei terus ngesah ngagai endur penusah nyadi bejalaika pansik.
Nitih ku Awang Alfian, lebuh sida datai ba dia, raban polis tetemuka bangkai siku lelaki begari enggau ngena baju biru tuai enggau tanchut pandak chura chelum gegaring, gali singit ke kiba siti ari bilik ba ringkat atas rumah nya.
“Nadai sebarang penerang diri enggau tingki ditemu ba tubuh bangkai nya.
“Niang apin dikelala nama lalu bangkai iya udah dibai ngagai Sepital Sarikei ngambika atur pengawa patut dipejalai.
“Nyentuk diatu, kes tu dikumbai kes mati ngenyit, lalu pansik silik dipejalai,” ku iya madah nyemetak.
Berebak enggau nya Awang Alfian bela minta sebarang raban enggau isi bilik ti bisi lenyau diri sebilik dipinta datai ke mua ngaga ripot ba Opis Polis Sarikei tauka sebarang opis besemak ngambika pengawa ngelala ulih dipejalai.