Aum video deka dikena ngenatai berita sentang gaya penusah ampuh bah di Sarawak

KUCHING: Bilik Operasyen Komiti Mutarka Penusah Ngenyit Nengeri deka ngena aum video nyadika chara ngenataika berita ke pemadu baru sentang gaya penusah ampuh bah ba tetiap pelilih menua di Sarawak.

Sapit Kepla Menteri, Datuk Amar Douglas Uggah Embas madahka sistem nya pasang lalu sedia dikena sebarang maya.

Ku iya, Bilik Operasyen Nengeri ba Wisma Bapa Malaysia ditu ulih ngena aum video enggau semua pelilih menua di Sarawak.

“Kami udah nguji enggau sekeda kandang endur lalu nya dipeda manah amat. Reti nya, sebarang randau kami enggau pelilih menua tauka renggat bagi menua udah tu bekaul enggau pemadah penusah ampuh bah deka dipancharka terus ngagai raban nya.

“Ari nya kami ulih nganjung tim kami lalu baka ni sida bejalaika pengawa maya nya,” ku iya madah ngagai pengarang berita pengudah nyadi chairman aum Komiti Penusah Ngenyit ditu kemari.

Uggah mega madah, gaya ke pem adu baaru eng gau penyampau pengereja pengawa ke bisi diatu.

Ku iya, bisi 22,436 pemesai ari Raban Soldadu, Opis Penyaga Pengelikun Mensia Mayuh, Opis Bomba enggau Penyelamat, polis, Volunteer, Opis Pengintu Pengelantang, Opis Pengerai,Opis Residen enggau Opis Pelilih Menua ti udah nyendiaka diri diatu.

Kelimpah ari nya ku iya, lima buah helikopter, lima drone, 131 buah lori, 184 buah kerita 4WD, 328 perau, 101 ambulan udah sedia dikena ba 621 palan ngenduh sementara, ti muat endur urung 200,000 orang ke tasah di semua Bagi Menua, udah diaktifka.

“Aku gaga amat ati enggau penyendia semua ejensi ti deka napi musim monsun ke deka datai.

“Kami bisi peneleba mutarka penusah ampuh bah. Semina menua ke balat ampuh bah dijangka betukar laban ba taun 2016 nyadi di Kuching, 2017 di Miri enggau 2018 di Selangau. Taun tu kami bedau nemu ampuh bah besai nya nyadi,” ku iya.

Iya mega ngenukuka, sebarang utai kenyadi, komiti nya udah berandau panjai sentang dini alai sida patut ngeletakka kereban sia, ngambika ulih meri bantu ke pemadu mnah ngagai orang ke tasah ampuh bah, nyeliahka pengerusaj reta tengkira nyengkaum bebadi nyawa.

Ku Uggah, nengah peneleba ke sebedau tu Sarawak berengkah napi penanggul ampuh bah besai berengkah ari bulan Disember nyentuk bulan Mac.

“Taun baru ila, kami apin nemu. Kitai besampi ngambika nadai nyadi ampuh bah,” ku iya.