Semua projek RTP ungkup lima sekula sekondari di Miri dipelaba tembu taun baru

MIRI: Semua projek Transformasyen Menua Pesisir (RTP) ti dikemendarka Perintah Sarawak bisi RM530,000 ungkup lima buah sekula sekondari dipelaba tembu taun baru.

Kaban Kunsil Nengeri (ADUN) Piasau, Datuk Sebastian Ting madahka semua lima buah sekula deka nerima urung RM106,000 dikena ngemanahka perengkaguna sekula.

“Kitai lantang ati laban semua kereja pejalai projek RTP benung dipejalai enggau lanchar lalu dipelaba tembu dalam timpuh enam bulan,” ku iya lebuh ngabas Sekula Sekondari (SM) Sains Miri ensanus.

Ting madahka agih belanja nya diberi ngagai SMK St Columba Miri, SMK St Joseph, SMK Chung Hua Miri, SMK Agama Miri enggau SM Sains Miri.

“Agih belanja RTP tu pekara nyata mandangka perintah nengeri endang siru amat ke peminta raban sekula kelebih agi dikena ngemanahka perengkaguna sekula,” ku iya.

Ting madahka ungkup SM Sains, agih belanja deka dikena ngaga panggau enggau ngemanahka blok buding.

“Sehari tu (ensanus) kitai meda semua projek benung dipejalai lalu ba SM Sains, projek tu dipelaba tembu dalam bulan Mei taun baru,” ku iya.

Ku iya nambah, projek nya beguna amat dikena nentuka bala nembiak lantang sereta ulih ngasaika perengka guna ti bisi disedia .

“Pelajar nyadi pekara dikemerat perintah nengeri lalu kitai deka seruran ngintu pengelantang pelajar bala anak kitai,” ku iya.

Projek tu diatu benung digaga kunteriktor ti dipadu Opis Kereja Raya (JKR) Miri.

Kelimpah ari SM Sains, Ting mega bisi ngabas SMK Luak Miri enggau SMK Chung Hua Miri meda gaya pemansang projek RTP ba sekula nya.

Sama datai Prinsipal SM Sains, Mohd Dzul Badzli enggau pengari JKR Miri, Kudang Luang.