Sejarah lebih 60 taun Sarawak sekumbang dipegai perintah besai kitai mayuh lenyau hak ke beguna dalam MA63
KUCHING: Rayat Sarawak tulin sereta ngembuan penyiru ngagai menua diri sigi enda ngelakka kuar luar merintah nengeri tu.
Kaban Kunsil Nengeri (ADUN) Engkilili Dr Johnical Rayong Ngipa nyemetak madah sejarah lebih 60 taun Sarawak dibaruh kuasa perintah besai lebih agi dalam nentuka hak pemadu beguna Sarawak baka MA63, pengeraja asal Sarawak, pekara pelajar enggau kuasa penuh imigresen patut nyadika lalau iya nya kitai udah lenyau kuasa rasmi nya.
“Kitai enda nyalahka perintah dulu suba tang ketegal penyedar nya nyadi kitai patut nentuka kuing tuju Sarawak nitihka chuan enggau nitihka peneka peranak asal ti keran deka meda kuasa nya diberi pulai enggau lengka nitihka Sempekat Malaysia 1963,” ku Dr Rayong.
Iya madah munyi nya rambau bejadika Pengerami Nutup Kem Pengelandik diatur PPKS/iCATS sereta Projek Jalai Rumah Unya Saran, Jambu Lalang, Ulu Skrang ensana.
Dulu ari nya, jalai simen ke udah tembu beungkus RM200,000 nya diambi ari RTP iya ungkup taun 2018. Nambah nya, iya madahka pengawa ngaga parit nya mega dibaruh RTP ungkup taun 2019 beungkus RM100,000.
Tandu iya ke mega Ketuai Nembiak Parti Rakyat Bersatu (UPP) nya mega, rayat Sarawak enda patut alah umbuk jaku manis ke udah enggau benung diterenak parti ke bepengkalan ari Semenanjung Malaysia baka i UMNO, PAS, sereta AMANAH, BERSATU, DAP enggau PKR ti udah numbuhka perintah Pakatan Harapan (PH) ba renggat Perintah Besai.
“Sebedau PH ngembuan juluk nguasa Sarawak ba Pengawa Bepilih Besai Nengeri (PRN) ke dipelaba diatur 2021, sida patut mandangka sida lebih manah ari perintah ke diatu lebih agi dalam ngamatka manisfesto ke digaga ungkup PRU ke udah,” ku iya.
“Kitai mega ngarap pengaari PH ari Sarawak enggau inggar agi dalam nagih hak Sarawak laban maya diatu
Kitai enda nyalahka perintah dulu suba tang ketegal penyedar nya nyadi kitai patut nentuka kuing tuju Sarawak nitihka chuan enggau nitihka peneka peranak asal ti keran deka meda kuasa nya diberi pulai enggau lengka nitihka Sempekat Malaysia 1963. Dr Johnical Rayong Ngipa ADUN Engkilili
penatai sida sempama baka ngenyukupka rintai kabinet lalu semina nyadi senurut ba mayuh pekara tang nadai daya deka mutar pekara ke beguna lebih agi sentang hak Sarawak dalam MA63, isu royalti minyak, sekula repuk, isu rega barang ke mengkang mar sereta agih belanja ke jauh lebih mit dibanding enggau nengeri ba Semenanjung,” ku iya.
Lebih manah agi ku iya, entara isi jaku Menteri Besai Tun Dr Mahathir Mohamad maya bejadika Parti BERSATU di Bintulu entara nya madah tikas pengidup rayat Sarawak nadai mayuh berubah kenyau 50 taun dalam Malaysia dibanding enggau nengeri bukai ba Semenanjung.
“Tulung mih anang nyebut ngagai aku iya Dr Mahathir enda nemu pasal pekara nya laban iya empu kaban nyadi Menteri Besai Malaysia pengelama 22 taun lalu megai mayuh bengkah penuduk besai dalam kabinet...nyadi pekara tu patut ditanya baru ngagai iya nama udah digaga iya ungkup Sarawak ungkup timpuh ke chukup lama nya,”ku tandu iya.
“Nyadi iya patut nemu rayat Sarawak udah sekali agi meri awak ngagai iya enggau PH merintah Sarawak. Pesan aku chukup mih serak tu kitai alah laban jaku manis semua parti ari Semenanjung laban sida kebendar nadai ati deka ngemansang nengeri tu, pekara ti nyata dipeda nengah agih belanja ungkup Sarawak semina RM4.3 bilion ba Bajet 2019,” ku iya seraya ngela- lay semua rayat bela terus nyukung Kepala Menteri Datuk Amar Abang Johari Tun Openg dalam ngiring nengeri tu.
Ku iya, rayat Sarawak patut terus beserakup enggau ekerjasama ngemansang nengeri tu ngambi ulih sebaka enggau nengeri bukai di Malaysia ngena agih belanja ke chukup besai ungkup 2019.
Ngelansa pekara pelajar, Dr Rayong ngelalau raban nembiak lebih agi sida ke ngambi bidang vokasional kebendar tampak agi pengidup laban tu folus ngagai bidang bidang teknikal enggau pengelandik.
“Sarawak kebendar iya begunaka mayuh orang landik gawa enggau jelan pengelandik ba bidang SCORE ti nyendiaka gaji besai... nya alai manah agi nembiak rebak baru diatur tama bidang TVET.”
Ngelansa silik, iya mega minta komuniti menua pesisir terus bebendar agi ba bidang betanam betupi laban bidang nya tau meri penatai pemisi ke manah.
“Pia mega, aju deka kita enda ngarapka siti aja utai tanam awakka bisi asil bukai maya rega utai tanam nurun,” ku iya Sama bisi datai ba pengerami tu pengelicha iCATS enggau raban tuai rumah sereta bala bukai.