Kelab Krian Bikers numbuhka turu dikena mantu anak mit ti sakit riman
SARATOK: Sida Lim Pok San sebilik napi penusah besai kenyau ari anak iya, Angelina Mit Lim, 7, ditukuka sakit riman untak tikas 4.
Angelina Mit Lim siku nembiak Taun 1 ari Sekula Primari (SK) St. Peter Saratok udah dituku sakit riman untak tikas 4 kenyau ari taun nyin tadi.
Pengemata Kelab Krian Bikers, Robin Patrick madah, pengudah sakit, awak Angelina Lim mayuh agi dikena berubat ba sepital.
“Kami udah dipadahka sida Angelina Mit Lim sebilik, berengkah ari taun nyin tadi nyentuk diatu, lebuh bala bakih bukai ti serambau besekula, iya (Angelina) berubat ba sepital.
“Juluk enggau semengat tinggi deka besekula enggau ngena awak bemain baka nembiak mit bukai begulai enggau bala bakih semina ulih disimpan aja laban deka berubat ngambika gerai.
“Diatu, nembiak mit tu semina gali gegaring ba katil aja, tang sida sebilik nadai kala mantul ati nganjung Angelina berubat baka selama,” ku iya lebuh dirandau pengarang berita kemari.
Apai Angelina gawa nyadi mekanik kerita ba sebuah bengkel kerita ba Bintulu seraya indai iya nadai kereja.
Ketegal penyiru enggau tanggungpengawa rama raban Kelab Krian Bikers udah numbuhka wang turu bantu sida Angelina sebilik, ‘ Tabung Demimu Angelina’ kena 24 November tu tadi.
Wang turu tu ditumbuh enggau tuju ngiga belanja ngambika diberi ngagai sida Angelina sebilik, nyaup nge- lempungka tating belanja sida sbilik ti nampung belanja perubat iya.
Berebak enggau nya, pemeri tu mega dikena sida Angelina sebilik bebelika barang baka susu tepung formula khas, lampin enggau belanja bukai ti ngaul perubat.
Kenu ku Robin, barang sapa ti deka nyuaka pemeri ngagai wang turu nya tauka deka nemu silik pasal Angelina tau betelefon nuju iya empu ba lumur 011-333022803.
“Kita mega tau berandau tauka nyua empu bantu enggau pemeri ngagai sida Angelina sebilik ba Rumah Jenaidee Melina, Disso Saratok.
“Pemeri enggau sukung semua raban beguna amat dikena ngelempungka tating penusah ditapi sida sebilik ti naka ulih ngubat Angelina ngambika ulih pulai gerai baka selama,” ku Robin.