Simoi udah ngatur randau begulai enggau ketuai komuniti di DUN Lingga

SRI AMAN: Kaban Kunsil Nengeri (ADUN) Lingga Simoi Peri udah ngatur randau begulai enggau bala tuai rumah sereta kapitan bekaul enggau gaya politik kitai diatu di Sarawak lalu bisi mega nyebut pasal pemansang ti benung dipejalai perintah nengeri diatu ti diatur ba Palan Servis Komuniti DUN Lingga ditu pagi kemari.

Ku iya, sama mega bisi dikerandau iya nya Bajet 2019 ti nyadi di kandang menua DUN Lingga sereta tanggungpengawa ketuai raban bansa dalam meri komitmen ngagai perintah nengeri Sarawak.

“Randau sekali tu sama mega bisi bekaul Sempekat Malaysia 1963, OMO 1958, pekara ti nyadi diatu ba DUN Lingga sereta madah ngagai sida iya nya Gabungan Parti Sarawak (GPS) diatu udah dikemendar kena 19 November tu tadi lalu GPS udah ngaga pemutus deka bejadika parti nya kena 19 Januari ti deka datai,” ku iya.

Berindik ari nya, Simoi mega udah minta bala ketuai komuniti di DUN Lingga ngambika terus meri sukung ngagai ketuai ti megai perintah nengeri diatu ti deka nentuka mayuh agi pemansang ungkup nengeri tu nyeng- kaum projek pemansang ti benung chakah dipejalai di DUN Lingga.

“Nyadi siku pengari rayat kita di sitak tu, kami ari perintah nengeri endang ngarapka sukung tegut rayat kitai di nengeri tu ngambika sama begulai enggau ketuai ti megai perintah nengeri nyingkang segulai sejalai lalu bekerejasama dalam nentuka nengeri Sarawak kitai tu terus mansang,” ku iya nyemetak.

Sama bisi datai ba randau nya Sapit Ketuai Pampang Parti Pesaka Bumiputera Bersatu (PBB) DUN Lingga Mohd Yusuf Lugom sereta kaban PBB ke bukai.