KPM enda patut bechiping maya ngatur silibus baru subjek Sejarah

MUKAH: Opis Menteri Pelajar Malaysia ( KPM) enda patut bechiping lebuh ti ngatur silibus baru subjek Sejarah lalu patut ngemayuhka agi elemen ti patut ke bukai dalam subjek nya.

Kaban Kunsil Nengeri (ADUN) Tellian Yussibnosh Balo madahka mayuh pekara bukai ke patut ditambah.

“Nyema deka ngemasukka isu bekaul 1Malaysia Development Berhad ( 1MDB), skandal Bumiputera Malaysia FInance (BMF) mega patut ipasukka laban nya ngembuan ajar ti sebaka,” ku iya madah ngagai Utusan BOrneo kemari.

Ukai semina nya aja, hal bekaul enggau Sempekat Malaysia 1963 (MA63) mega ku iya sampai ke diatu enda disebut enggau silik dalam subjek nya.

Tu bekaul 18 pekara ungkup Sarawak lalu 20 pekara agi ungkup Sabah ti endang udah bisi dalam MA63.

“Nya ( MA63) enggau pekara bukai ti disebut aku endang sejarah bakani menua Malaysia ditumbuh,” ku iya nerang baru.

Kebuah pia, tu ngambika raban nembiak rebak baru Malaysia nemu sereta bebasaka pekara manah di tetiap bagi menua ba menua tu.

Kelimpah ari nya, tetiap nengeri di Malaysia mega patut ngembuan sejarah kediri lalu nya mega patut disebut.

Bedau lama tu tadi, MEnteri Pelajar MAlaysia mega sama bisi madah iya nya pekara bekaul enggau 1MDB nyangka deka diengkah dalam subjek sejarah.

Taja pia, buah runding tu udah meri mayuh macham timbal ari semua raban tauka ejensi di menua tu.