Pengaya pengeraja asal endang pesaka ke berega ngagai industri dagang temuai nengeri tu, ku Abang Johari
KUCHING: Sarawak merambu deka numbuhka mayuh agi palan ‘taman negara’ dikena nangkup peminta temuai ke nengeri tu. Ketua Menteri, Datuk Patinggi Abang Johari Tun Abang Openg madah, pengaya pengeraja asal endang pesaka ke berega ngagai industri dagang temuai nengeri tu. Nya alai, ku iya mayuh bengkah pengawa nyengaka nyaga enggau ngintu rampa menua asal dikereja perintah nengeri. “Kitai meda industri ‘hospitaliti’ enggau dagang temuai ngembuan tanggungpengawa ke berat dalam matak penatai temuai lalu ba taun nyin kemari Sarawak mujur matak penatai urung 4.86 juta iku temuai. “Tebal agi temuai tu endang sida ti rinduka rampa menua asal sereta rinduka pengawa neresa rampa menua di nengeri tu. “Beratika kebuah nya mih, nyadi kitai deka fokus ngagai pengawa numbuhka mayuh agi taman negara ba Sarawak dikena matak penatai temuai ari dalam enggau luar nengeri kelimpah nyaga rampa menua,” ku iya serata melabaka urung 5.25 juta iku temuai raun ke Sarawak ba taun tu. Iya madah munyi nya maya bejaku bejadika Aum Besai Fokus QS Subjek ungkup Industri Hospitaliti enggau Dagang Temuai ti berambika jaku “The Way Forward: Hospitality and Tourism Education Convergence with Industry 4.0” di sebuah hotel tebilang ditu, malam esana. Ba pengerami nya, Abang Johari bisi bejadika UCSI Sarawak nyadi Palan Pengelandik Serantau (RCE) Kuching nengah Universiti Gerempung Serakup Bansa ti negika enam inisiatif di baruh juluk Pemansang Nemban Menua Bersatu ( SDGS) mungkur Pelajar Bekualiti, Ai Beresi enggau Chukup Intu, Mengeri enggau Komuniti Nemban enggau Pengidup ba Di Darat. Ngelansa pasal aum nya enggau UCSI Sarawak diangkat nyadi RCE Kuching, Abang Johari madahka nya endang siti jerita besejarah ungkup universiti bekaul. “Tambah mega, aku deka meri pengaga ati ngagai UCSI laban nyadi 10 universiti pemadu manah di Malaysia nen- gah latih QS World University Rankings 2019,”ku iya. Nyadi sebuah institusi ke manah rikod nyadi palan aum pengelama tiga hari, Abang Johari madahka pengandal nya deka nyadi pelasar pemadu manah endur berandau sereta mansik enggau silik agi pekara hospitaliti enggau dagang temuai. Berebak enggau nya, Mandal Chanselor enggau Presiden Universiti UCSI, Profesor Kanan, Dato’ Dr Khalid Yusoff madah, urung 20 pengelicha ari industri bekaul ngambi bagi ba aum besai nya. Kenu ku iya, aum besai nya betuju dikena ngulihka penemu sereta nyikap diri ari ulah pendiau sida. “Nya alai, aku pechaya aum tu deka meri mayuh pemaik ngagai industri-industri bekaul kelebih agi ari nengeri tu dikena nyungkak sektor hospitaliti enggau dagang temuai,” ku iya. Dulu ari nya, urung 300 delegit ari serata menua ti nyereta aum nya berengkah 5 nyentuk 7 Disember tu. Sama bisi datai iya nya Menteri Pelajar, Sains enggau Pansik Teknologi, Datuk Seri Michael Manyin Jawong, Menteri Muda Pelajar, Sains enggau Pansik Teknologi, Dr Annuar Rapaee, Pemungkal Raban UCSI, Datuk Dr Peter Ng enggau Ketuai Pemesai Eksekutif QS Asia, Mandy Mok.
Kitai meda industri ‘hospitaliti’ enggau dagang temuai ngembuan tanggungpengawa ke berat dalam matak penatai temuai lalu ba taun nyin kemari Sarawak mujur matak penatai urung 4.86 juta iku temuai. Datuk Patinggi Abang Johari Tun Abang Openg Kepala Menteri Sarawak