Perintah nengeri bisi nyendiaka pinjau ungkup nembiak masuk i-CATS

KUCHING: Perintah nengeri nengah Yayasan Sarawak nyendiaka pinjau terus ngagai nembiak ti ngambi kus ba Kolej Antarabangsa Teknologi Lanjutan Sarawak (i-CATS).

Kepala Menteri Datuk Patinggi Abang Johari Tun Openg ke mega Chairman Yayasan Sarawak madah, pengawa nya digaga laban modal mensia pemadu beguna dikena nyaup ngemansangka nengeri tu.

“Aku udah ngaga pemutus iya nya genap nembiak kitai ke ngambi kus ba i-CATS deka diberi pinjau terus ari perintah nengeri nengah Yayasan Sarawak.

“Reti nya genap nembiak kitai ke diterima masuk iCATS lalu ngambi kus ba renggat diploma enggau degree, Yayasan Sarawak deka meri sida pinjau terus awakka sida nadai penanggul nampung pelajar,” ku iya.

Iya madah munyi nya rambau Pengerami Konvokesyen Pusat Pembangunan Kemahiran Sarawak ( PPKS)/ iCATS Ke-21 ke bela digulu Menteri Pelajar, Sains enggau Pansik Teknologi Dato Sri Michael Manyin enggau Chairman PPKS ke mega Presiden i-CATS, Tan Sri Datuk Amar Abdul Aziz Husain ba Palan Konvensyen Borneo Kuching ( BCCK) ditu, kemari.

Tandu Abang Johari nengah nya, tu deka ngemuntangka bala nembika ngulihka pinjau ungkup neruska pelajar sida.

“Enggau jaku puntang, kita enda ibuh irau bekaul enggau belanja. Udah kita diterima masuk i- CATS, perintah nengeri nengah Yayasan Sarawak deka meri kita (nembiak) pinjau terus,” ku iya.

Berebak enggau nya, iya meransang bala nembiak lebih agi bala graduet ba nengeri bebendar agi belajarka jaku English laban nya beguna amat.

Abang Johari madah, endang diaku jaku Melayu nyadi jaku rasmi menua lalu nya udah dipekat nitihka Perkara 152 Kontistusyen Menua, lalu deka terus ngetanka jaku Melayu nyadi jaku rasmi menua.

“Tang pengawa nguasa jaku bukai kelimpah ari jaku Melayu bela nyadi sukut berat diperati dikena nentuka graduet nya lalu ba makit kereja.

“Jaku English udah nyadi jaku penemu ba bidang Sains, Perubat enggau nyadi jaku penyambung ngagai Ekonomi Digital enggau Revolusi Industri 4.0.

“Seriris enggau tu, bala gra- duet patut landik Jaku English dikena napi ubah dunya ke maya hari enggau guna kereja dudi hari,” ku iya.

Tandu iya, bala graduet abis nadai enda rawak lebuh bejaku ngena jaku English ba maya ngereja pengawa, nyengkaum maya nyereta kus tauka ngulu licha ba renggat antarabansa enggau bekaul batang pengawa dikereja sida.

Berebak enggau nya, Abdul Aziz ba jaku iya madah ba jeman diatu revolusi 4.0, aplikasi teknologi digital enggau semua sektor nyengkaum pekara pelajar patut dikemerat.

Ku iya, PPKS patut nerima Industri 4.0 ngambika PPKS terus engkeman dipelajarka bala nembiak enggau ungkup industri.

“PPKS patut nempa Graduet Ayas Dudi Hari (Future Proof Graduates) nangkup Industri 4.0 manggai taun 2030.

“Bepun taun 2017, PPKS bejalaika tanggungpengawa nyadi Palan Penyulut dalam Teknologi Pemadah (CoET) chakah nyendiaka kus-kus ti bepelasarka guna industri di Sarawak,” ku iya.

Kemari, urung 1,107 graduet udah nerima setipikit enggau diploma kelai mujur nembuka pelajar ba bidang ke udah dipilih diri.