UPP diterima masuk GPS enti tiga perempat kaban gempung setuju

KUCHING: Parti Rakyat Bersatu ( UPP) ulih diterima dalam Gabungan Parti Sarawak ( GPS) enti tiga perempat kaban dalam gempung nya setuju.

Netapka pekara nya, Kepala Menteri Datuk Patinggi Abang Johari Tun Openg madah pemutus nya enda bepelasarka konsensus.

“Diatu kitai bedau ngaga sebarang pemutus, enti udah datai maya nya ila aku deka madah.

“Ulih diterima enti tiga perempat kaban dalam GPS setuju alai pemutus tu enda bepelasarka konsensus baka barisan (Barisan Nasional),” ku iya.

Abang Johari mansutka jaku nya lebuh ditanya pemberita pengudah bejadi ‘Extraordinary Delegate Conference’ ( EDC) Parti Rakyat Bersatu di Crown Square ditu, kemari.

EDC ke diatur nya disadang ngemendar resolusyen Parti Rakyat Bersatu (UPP) nukar nama nyadi Parti Sarawak Bersatu (PSB) alai parti mega ngelanchar lambang baru.

Ngenang kaul ke sama, iya ke mega Chairman GPS bedau deka nyaut tanya pemberita sekalika UPP bisi dipinta nyemilik GPS.

Ba jaku bejadi EDC dulu agi ari nya, Abang Johari muji UPP ti udah nusun baru kuing parti lalu nguna nama PSB.

Ku iya, UPP ke nyadi PSB udah ngatur diri ngambi ulih nitihka chara politik maya ke diatu.

“Reti nya parti tu enda diau diri pia aja tang deka majak mansang ke mua,” ku Abang Johari.

Chairman Parti Pesaka Bumiputera Bersatu (PBB) nya netapka kuing tetiap politik sigi bepelasarka rayat, iya nya meri pengelantang ngagai rayat.

Kitai ( parti politik) ku iya gawa ungkup rayat ngambika rayat ulih ngangkatka ikas pengidup sereta ngasaika pengelantang ba pengidup.

“Dikena nentuka juluk nya dijapai, kitai meseti ngerembaika ekonomi nengeri.

“Pengawa ekonomi tu udah tentu deka meri empas ke manah lalu ngangkatka ikas pengidup rayat,” ku iya.

Bela datai Presiden PSB Dato Sri Wong Soon Koh, Sekretari Besai George Lo, Sapit Presiden Datuk Jerip Susil enggau Ketuai Bagi Nembiak Dr. Johnical Rayong.