UPP ditukar nama ngagai PSB
KUCHING: Parti Rakyat Bersatu (UPP) diatu dikelala nengah nama baru, Parti Sarawak Bersatu (PSB).
Sekretari Besai PSB, George Lo madah atur ngubah nama parti nya udah disetuju rambau ‘Extraordinary Delegate Conference’ (EDC) ke diatur kemari.
Kelimpah nama, bala geligit mega setujuka logo baru parti ti mandangka gambar matahari angkat ari tanah Sarawak.
“Atur nukar nama enggau logo parti tu nyadi sebengkah konstitusyen parti ti ngelamatu nguna nama Parti Rakyat Bersatu (UPP).
“Tang pengudah ubah ba konstitusyen ti disetuju bala deligit ba EDC sehari tu, parti diatu dikelala nengah nama Parti Sarawak Bersatu (PSB) lalu ukai agi UPP,” ku iya ba aum pengarang berita tembu EDC kemari.
Ketegal nama enggau logo ke udah diubah nya, parti ku Lo deka nganjung pinta ngerijista parti ba Opis Pengerijista Gerempung (ROS) kena Hari Satu tu.
“Tajapan nama enggau logo tu bedau dikemendar ba ROS, tang ba ati kaban parti, kami PSB lalu ukai agi UPP.
“Ari pekara undang-undang, kami meseti nganti pemendar ari ROS tang diatu kami dikelala nengah nama PSB,” ku iya.
Dulu agi ari nya, presiden Dato Sri Wong Soon Koh ba jaku pengelalu EDC parti nya madah perambu nukar nama enggau logo parti udah dibai maya Aum Deligit Tiga Taun Sekali ti kedua parti ke diatur di Sibu kena 7 Julai 2018.
Ungkup tuju nya, siti tim pengereja pengawa ditumbuh ngambi tau ngemata perambu nukar nama enggau logo lalu tim nya udah merambu ngadu EDC endur ngerandau sereta mutuska nama enggau logo baru parti.
“Sekalika UPP tauka PSB, parti enda ngubah penetap parti ti ngarika genap pupu bansa.
“Kami seruran deka ngenanka penetap ngarika genap pupu bansa ke nyadi pengering parti lalu enda nerima komunalisme tauka milih bansa.
“Kami ngembuan runding ke tegap lalu tebuka dikena ngempung semua bansa dalam parti enggau Nengeri Sarawak,” ku Wong.
Logo baru parti mandangka matahari angkat ba tanah Sarawak lalu nya mai reti diak PSB sebengkah parti bepelasarka Sarawak ke tulin.
Tiga chura ke dikena (kuning, chelum enggau mirah) ngarika chura Nengeri Sarawak ti mandangka imej Sarawak ti diwan mayuh pupu bansa. KULAI: Presiden Parti Pribumi Bersatu Malaysia (Bersatu) Tan Sri Muhyiddin Yassin kemari nangkan ketuai partu nya ngambi enda nagang sebarang orang ke deka masuk parti nya.
Muhyiddin madah, kebuah pia laban parti nya agi begunaka mayuh agi kaban dikena ngenegapka diri sereta negika agenda ke udah ditaga.
“Kitai deka mayuh orang pandai, mayuh agi kaban, enggau mayuh orang ke sedia meri bantu (ngagai parti). Pejalai kitai agi jauh, baru dua taun. Nya alai mayuh pekara deka digaga,” ku iya madah ngagai pemberita pengudah bejadika Konvensyen Bersatu Johor ditu kemari.
Muhyiddin, ke mega Menteri Dalam Menua madah, Bersatu iya nya parti ti tebuka lalu enda sama enggau parti politik ke dulu suba ke udah alah ba pengawa bepilih ke udah ketegal ngemeranak politik ti kamah.
“Bersatu enda ngemeranak polisi baka nua. Kitai deka sida masuk lalu udah nya deka muka mayuh pampang, pekara nya dilempai ngagai ketuai renggat baruh,” ku Muhyiddin.
Muhyiddin madah ba menua Johor ambika banding, Bersatu diatu udah bisi lebih 180 pampang lalu ngarap penyampau nya deka betambah laban dudi hari ila deka mayuh agi peluang dibuka.
Ngelansa isu bukai, Muhyiddin madah iya nadai pengamat sentang berita ti madahka bisi piak ngujji ‘nukar’ Menteri Besai Johor.
“Tang dikena nentuka baru politik di negeri tu kikun, penuduk Menteri Besar enda patut diangjai,” ku iya lebuh nimbal bekaul enda lantang ati ngagai Tunku Mahkota Johor Tunku Ismail Sultan Ibrahim kemari sentang bisi piak deka nguji ‘nukar’ Menteri Besar Johor.
Ngelansa pasal konvensyen nya, Muhyiddin madah iya udah ngeletak fokus Pakatan Harapan ( PH) ngembuan Agenda Bumiputera lalu langkar baru nitihka konteks Malaysia baru.
Ku iya, PH enda ulih ngiarka agenda nya ba sebarang aja pengawa laban mayuh raban bansa bumiputera lebih agi Melayu deka nemu jamin pengidup sida dudi hari enggau ulih ke enda ngetanka penuduk sida.
“Sida bedau nemu silik bekaul enggau pekara nya, nya alai aku enda kakang madah deka fokus ngagai konsep shared prosperity tauka pengelantang begulai enggau berundingka pemaik pekara-pekara buki,” ku iya. — Bernama