Opis Kampung Sarawak udah mujur ngatur ‘Seminar RDID Kedua’
KUCHING: Bagi Pengawa Pansik, Pemansang enggau Inovasyen ( RDID) Opis Kampung Sarawak udah ngatur Seminar RDID Kedua ba sebuah hotel tebilang ditu, Hari Empat tu tadi.
Seminar nya udah digulu urung 120 iku penyereta datai ari bala pemesai Opis Kampung Sarawak.
Pengawa bejadik udah dipenyadika Penulung Direktor Kampung, RDID, Opis Kampung Sarawak, Runi Sylvester Pungga.
Berebak enggau nya, sepenyampau 15 keretas kereja udah dibantai rambau seminar nya ti mungkur kereja pansik pengelain utai tumbuh enggau utai idup sereta rampa ngelingi kampung.
Seminar nya dibagi ngagai tiga renggat lalu renggat keterubah pasal Ekologi enggau Pengawa Ngintu Rampa Menua Kampung dientudi renggat kedua pasal Pengelain Utai Tumbuh lalu Pengelain Utai Idup ungkup renggat ketiga.
Antara keretas kereja ti dibantai, Pengawa Numbuhka Plot Pansik ba Kandang Dijaga Amat, Pemerat Indu Sampuk enggau Ngambi Indu Sampuk ba Taman Negara Lambir, Miri, Pengawa Ngelala enggau Nanam Bansa Gaharu ba Sarawak enggau Pansik Anatomi Kayu.