Peranak di Batang Igan dipinta sabar nganti pemansang ari perintah: Juanda

Utusan Borneo (Sarawak) - - Berita Iban -

MUKAH: Peranak diau di kandang menua Batang Igan dikearap ulih sabar nganti pemansang ti deka dibai ngagai kandang menua nya.

Kaban Kunsil Nengeri (ADUN) Jemoreng Datuk Dr Juanda Jaya madah tu deka berengkah enggau jampat penguah jalai alun mujur digaga dia.

“Sehari tu kitai bejadika Jalai Kebuaw-Igan urung enam kilometer ( KM) pemanjai ti mega mungkur tiga jematan,” ku iya rambau Pengerami Mantar Krismas Renggat Pelilih Matu enggau Bejadika Jalai Kebuaw Igan kemari.

Nitih ku iya, ke amat, pekara ti nyangka diperunding enda ulih nyadi nyata 10 taun ke udah diatu nyata ulih dipejalai.

Ngaku tu ukai siti pangku pengawa muntang, tang peminta rayat enggau peneka sida patut ditangkup.

“Laban kitai nemu pengudah jalai alun digaga pemansang bukai mega deka jampat entudi,” ku iya nerang.

Iya mega madahka jalai nya deka dibelakin lalu dipelaba tembu dalam pun Januari 2019.

Ukai semina nya aja, jalai penyambung udah nya Kebuaw- Teluk Deloh lebih kurang pemanjai ti sama deka digaga lalu iya udah mantaika pekara nya ba aum DUN tu tadi.

Berebak enggau nya, Juanda mega madahka Jalai Ogan- Sunhai Ilas mega dalam proses tinda.

“Kitai dekaka semua peranak sabar laban tetiap pemesai enda deka lari ari komitmen ngemansangka nengeri enggau kandang menua sida,” ku iya.

Juanda mega nibarka jaku pesan ngambika pengelebih idup lantang taja bebida pengarap enggau bansa tang patut dikemerat.

Semina nengah nya aja mega tetiap pemansang enggau juluk deka ulih dijapai.

Berebak enggau pengerami nya mega bini iya, Datin Shanti Ahmad nyuaka bantu ngagai peranak ngarima Sarawak Badan Amal Tenaga Isteri-Isteri (SABATI).

Sama datai Pemesai pelilih Matu Wan Hipeni Wan Mohd, Injinir Bagi Menua Mukah Toh Cjee Leong, Ketuai Bansa Kampung Kebuaw Ismail Kiai, Tuai Rumah Mission Sangau sereta peranak diau ngelingi.

DR JUANDA

Newspapers in Malay

Newspapers from Malaysia

© PressReader. All rights reserved.