Gerija St Lawrence mujur ngatur pengerami makai lemai Ngintu Musim Advent
KUCHING: Pengerami Makai Lemai Ngintu Musim Advent diatur Raban Indu Gerija St Lawrence diatur enggau mujur ba Restoren Eden Sri Aman apin lama ke udah.
Temuai dipebasa ti bisi datai lalu bejadika pengerami nya iya nya Menteri Muda Pengelantang Komuniti, Datuk Francis Harden Hollis ti mega patron pengerami.
Francis ba jaku dipansutka iya, meri jaku puji enggau terima kasih ngagai raban pengatur ti mujur ngempung mensia mayuh ngulu pengerami nya.
“Penatai bala kita endang dikelalu nyadi siti ari chara kitai mantu melanja bemacham ak- tiviti ti deka dipejalai ila,” ku iya.
Nitih ku iya, pemansang rohani ti teguh belalauka mulia jaku Tuhan ulih ngempung komuniti ti bisi runding positif dalam penyerakup raban bansa.
“Berebak enggau nya, kita mega udah nyata ngayanka semengat positif sereta penyerakup raban bansa, bela begulai meri sukung lalu nentuka pengerami lanchar.
“Aku ngarapka semengat baka tu deka seruran dikemeran dataika jemah pulaika pemaik kitai begulai,” ku iya.
Berebak enggau nya, Francis ti mega Kaban Kunsil Nengeri (ADUN) Simanggang ngemendarka agih belanja geran Projek Mit Pemansang Menua Pesisir (MRP) penyampau RM20,000 ngagai Diocesan Women’s Fellowship (DWF) ungkup taun 2019.
Sebedau nya, urung 800 iku temuai datai ngulu pengerami nyengkaum Paderi Gerija St Lawrence, Rev Jackson Jarau enggau The Venerable Canon Jamal Senada, Arcdeacon of Central Archdeaconry.