KPDHEP deka mayuh kedai besai nyereta Program Bank Pemakai
KUCHING: Opis Menteri Dagang Dalam Menua enggau Pekara Penguna (KPDHEP) deka meda mayuh agi kedai besai ba serata menua Malaysia nyereta Program Bank Pemakai dikena mantu orang tusah.
Sapit Menteri iya, Chong Chieng Jen madah tuju program nya ukai semina dikena mantu orang tusah nengah bantu pemakai tang mega dikena mutarka penanggul ngerua pemakai.
“Tebal agi kedai besai deka muai pemakai ke enda abis dijual, ari dibuai pia aja manah agi pemakai nya ti agi manah sereta tau diempa diberi ngagai sida ti suntuk pemakai.
Tu mega inisiatif opis menteri dikena mantu sida ti tusah, abis nadai dikena ngelempungka tating belanja raban sida nya sereta dikena ngelimat belanja sida ari meri barang pemakai,” ku iya maya bejaku ba Pengerami Krismas diatur Malaysia AEON Founda- tion begulai enggau Gerempung Bansa Dayak Bidayuh ( DBNA) ditu, kemari.
Sama bisi datai, Sapit Presiden Malaysia AEON Foundation, Kenji Fujita enggau Sapit Presiden DBNA, Jimas Jihel.
Chong madah, Pulau Pinang deka nyadi nengeri keterubah bejadika program pemungkal nya ujung bulan tu ditangkan enggau nengeri- nengeri bukai.
Sebedau tu, Sapit Menteri Besai Dr Wan Azizah Wan Ismail madah raban ke diselinting ungkup program nya datai ari ruang bilik ke kurang penatai pemisi iya nya kurang RM930 sebulan.
Sepenyampau 50 ruang bilik nyengkaum 100 iku anak mit udah nerima bantu pemakai, pekayan enggau anak belanja ari piak AEON dikena ngurangka tating penusah sida nyerumba Hari Krismas ke diintu kena 25 Disember tu. — Bernama