Pemujur ubah deka mai reti kitai deka nyadi pengeluar kuantiti enggau ngembuan kualiti ke besai agi, ku Uggah
KUCHING: Opis Menteri Betanam Betupi Moden, Tanah Adat enggau Pemansang Kandang Menua (MANRED) deka seruran meri pemerat ubah besai ba sektor betanam betupi nengeri.
Menteri iya, Sapit Kepala Menteri Datuk Amar Douglas Uggah Embas madahka tu deka nyadi pengeran ungkup sektor ti dinamik, moden enggau progresif ke alai teknologi pengeluar moden deka nyadi antara pekara ti beguna iya.
“Pemujur ubah deka mai reti kitai deka nyadi pengeluar kuantiti enggau ngembuan kualiti ke besai agi.
“Tu mega mai reti kitai ulih nambahka penatai pemisi raban bumai enggau ngemunaska penyeranta menua pesisir,” ku iya lebuh bejadika pengerami makai lemai ngenang jasa MANRED ba Damai Puri Resort di Santubong semak ditu, malam Hari Lima tu tadi.
Tu mega mai reti kitai ulih nambahka penatai pemisi raban bumai enggau ngemunaska penyeranta menua pesisir. Datuk Amar Douglas Uggah Embas Menteri Betanam Betupi Moden, Tanah Adat enggau Pemansang Kandang Menua
Ku iya nambah, Sarawak deka nyadi pengeksport pemakai datai ba taun 2030 ke alai ti nyadi juluk besai perintah nengeri di baruh ketuai dipegai Kepala Menteri Datuk Patinggi Abang Johari Tun Openg.
Nuju nya ku Uggah, semua oemesai ba opis menteri enggau opis patut begempung gawa nentuka pemerat tu dijapai.
“Kitai semua bisi juluk ti beguna amat ungkup menua ti diangkunka kitai tu.
“Kitai udah ngagihka belanja penyampau RM450 juta di baruh Atur Pemansang Malaysia Lumpar Ke- 11 (RMK11).
“Patut nadai sebarang ati nyima tauka ulah enda puas ati,” ku iya.
Ngelansa pasal gempuru makai lemai nya, iya meri tabi puji ngagai chairman pengatur enggau Sekretari Mendam MANRED Datu Ik Pahon Joyik ti udah ngatur pengerami, ku iya, tu nyadi pelasar ngagai semua pemesai enggau sida sebilik ngelala pangan diri enggau semak agi.
“Tu ulih meri awak nempa rampa lantang agi sereta rampa kereja ti kondusif agi ungkup semua,” ku iya.
Lemai nya mega pengawa nyuaka tanda basa penyulut servis ngagai bala pemesai sereta mega nyuaka tanda basa ngagai sida ti pinchin gawa enggau sida ti mindah gawa ngagai opis bukai ba taun baru.
Sama datai begempuru bini iya, Datin Amar Doreen Mayang, Menteri Muda Pemansang Tanah Adat Datuk Roland Sagah enggau Menteri Muda Betanam Betupi Dr. Abdul Rahman Ismail sereta bala bini sida.
Sama bisi datai Sekretari Politik Kepala Menteri Dr. Richard Rapu, Direktor Opis Betanam Betupi Alvin Chai enggau Direktor Opis Servis Veterinar Nengeri Dr. Adrian Susin.
Udah nya Uggah bisi nge- mendarka geran penyampau RM40,000 ungkup Kelab Ruang Bilik enggau Rama MANRED seraya Datuk Sagah enggau Dr. Abdul Rahman meri RM20,000 siku.