Siku indu rugi urung RM913,504 ditipu nengah ‘African Love Scam’

SARIKEI: Siti kes modus operandi ‘African Love Scam’ udah mujur nipu siku indu ti gawa ba broker berumah lalu ngujungka indu nya rugi urung RM913,504.

Ba kes tu, indu beumur 51, udah ditipu siku orang ti dikelala iya nengah media rama ‘Facebook’.

Ketuai Opis Pansik Penyalah Komersial ( JSJK) Sarawak, Superintenden Mustafa Kamal Gani Abdullah madah, penusah nya nyadi urung bulan April nyentuk 5 Disember taun tu.

“Belalauka penerang ari indu nya, dalam bulan April 2018, iya udah bekelala enggau siku lelaki ba media rama Facebook ti ngelar diri enggau nama ‘Chen Wei’.

“Lebuh madahka nama diri, Chen Wei madah ngagai iya ke alai iya peranak Malaysia, tang udah diau mendam ba Amerika (USA).

“Indu nya suah berand- au enggau suspek ngena Whastapps Messenger lalu dalam tengan bulan Mei 2018, suspek ( Chen Wei) madahka indu nya ke alai iya deka datai ngagai Malaysia laban deka ngatur dagang enggau projek ditu,” ku iya ba penerang berita, kemari.

Taja pia ku iya, suspek madahka indu nya ke alai iya bisi penanggul lalu udah ditan raban polis Malaysia laban ngaul diri ba pengawa ngubah duit chara belalai.

Nya kebuah suspek udah minta bantu indu nya, nginjau duit laban napi penanggul belanja.

“Sinuka penanggul dipadahka suspek, indu nya udah ngenamakka duit penyampau RM2,000 ari sebuah bank ba Sarikei dalam tengan bulan Mei.

“Pengudah nya mega, indu nya bela mayar chara berenggat sepenyampau 22 transak- syen ngagai akaun ti bebida lalu udah nyerahka mata duit penyampau RM10,000 ngagai siku indu ba Hotel S. Damansara Kuala Lumpur kena 17 Julai tu tadi.

“Berebak enggau nya mega, indu nya bela ngirumka pasport antarabansa iya ngagai suspek enggau tuju ngulihka visa,” ku iya.

Ba lansa bukai, siti agi kes bukai ti diripot nyadi ba Kuching, ku iya, siku lelaki beumur 24 taun rugi RM900 pengudah ditipu kes nipu ‘Macau Scam’.

Ba kes nya, ku Mustafa, lelaki ti bekereja ba sebuah serikat peribit kena 7 Disember udah nerima kangau ari siku lelaki ti ngumbai diri siku pemesai ari Komiti Nagang Pengawa Makai Suap Malaysia (SPRM).

“Suspek udah madahka lelaki nya udah ngereja pengawa belalai nengah online banking lalu ngemba iya ngambika mayar penyampau duit dikena nyeliahka diri ari waran tangkap dikeluar ngagai iya.

“Takut diemba, lelaki nya udah meri ‘username Cimbclicke’ dan enggau passwaord bank ngagai suspek.

“Selang beberapa minit pengudah nya, iya menerima pesan jaku pandak (SMS) ari bank ti madahka iya ngaga transaksyen ngagai sebuah akuan Bank Muamalat di atas nama Norhaiza sepenyampau RM900,” ku iya.

Sedarka diri ditipu, seduai bela ngaga ripot polis lalu kes tu agi dipansik.

Pia mega, tiga iku individu ari Miri enggau siku ari Mukah mujur nyeliahka diri ari kena tipu ‘Macau Scam’ lalu terus ngaga ripot polis.

Nadai sebarang rugi diripot lalu raban polis agi bejalaika pansik silik bekaul enggau ripot ti udah digaga sida betubuh empat tu.