Makit Asil Betanam meri pemaik ngagai pedagang menua pesisir

BAU: Makit Asil Betanam beperabung deka meransang mayuh agi raban pedaja ari menua pesisir sitak Pelilih Bau dudi hari.

Lebih 100 pedaja ari Pelilih Bau nyereta Makit Asil Betanam me dibuka berengkah pukul 6 pagi ninting hari.

ADUN Tasik Biru, Dato Henry ak Jinep madah, penyereta ari raban orang bumai enggau peranak besemak chukup ngemantup ati bepun ari semina 40 penyereta sebedau tu.

Kenu ku iya, piak sida deka ngaga makit bisi perabung nya enggau chara berenggat kelimpah ngiga palan engkeman.

“Enda kurang ari RM50,000 diagih ninting bulan dikena ngemanah Makit Asil Betanam Bau.

“Kitai ngelempaika ngagai Kaunsil Pelilih Bau berati palan ke engkeman nirika Makit Asil Betanam Bau ti beperabung,” ku iya rambau Ngemujurka Program 3R nyerumba Pengawa Nyerahka Makit Asil Betanam Bau ditu, ensana.

Iya madah, perintaj seruran meri utai ke pemadu manah ngagai raban lebih agi ungkup pengelantang pedaja enggau pengusung.

“Terubah iya suba makit asil betanam dipeda ngachir sereta enda chakah. Manifesto kitai sebedau tu, deka nyungkak ekonomi sitak Bau.

“Nya alai, perintah deka numbuhka palan ti lantang, badu agi ngena langkau ke luya.

“Perengka guna ungkup pedaja enggau numbuhka Makit Asil Betanam Bau ke menyana meri pengelantang ngagai rayat.

“Lebuh pengusung datai dia sida meda pendiau ditu beresi, berurun lalu nitih perambu nyadi nya nger- induka mata orang ti datai ngagai Bau,” ku iya.

Iya madah, bisi dipeda pemansang ari sukut sosioeknomi ba peranak genturung pendiau ke deka nyadi orang dagang.

Ku iya, tanah puang patut dikemansang ungkup pengawa betanam betupi dandang besai dikena nambahka penatai pemisi.

“Kitai meda mayuh orang ari menua pesisir rindu bejualka utai tanah ari kebuan sida. Iya madah, perintah deka meda sitak Bau nyentuk ke Lundu nyadi palan ngemansut ari betanam betupi jemah ila.

“Nya alai, kami nyaut peransang ari perintah deka ngaga Bau nyadi palan pengeluar pemakai ila,” ku iya.

Bela datai Pemesai Pelilih Bau, Anielia Siam enggau Sekretari MDB, Simon Wong Hong Yong.