Mensia mayuh agi bedau nemu reti penyakit AIDS, HIV

SIBU: Tebal agi mensia mayuh diatu enda nemu reti penyakit AIDS enggau HIV kelimpah madahka penyakit tu enda ulih diubat.

Direktor Sepital Sibu Dr Ngian Hie Ung madah, ketegal nya mayuh orang enggai besemak sereta takut begulai enggau sida ke napi penyakit tu.

“Penyakit Aids/ HIV tu enda ulih disuman tang ulih diubat. Nya alai maya hari tu, kami madahka penyakit tu baka diabetes enggau hipertensyen,” pia ku iya.

Dr Ngian mantaika pekara tu maya bejadi program belanda ‘Race Against Stigma’ ke diatur Unit Penyakit Berampit (ID) Sepital Sibu ba Dataran Bandar Sibu Fasa I, kemari.

Pelanda penyauh lima kilometer tu mujur matak 655 iku penyereta lalu tebal agi bala lutur, misi kelimpah mensia mayuh ke bukai.

Ku iya, orang ke napi penyakit tu enda patut kelalu nangi laban agi ulih diubat.

Iya madah, bisi empat iti kebuah penyakit nya ngelekai iya nya baka pengawa beleman, besaum jarum tuchuk, dirampit ari kandung enggau darah.

“Penyakit tu enda ulih dirampit ketegal bepegai jari, beberap, besium, bekunsi pemakai tauka begulai ngena jamban.

“Kami ngatur program tu ngambika mensia mayuh nama reti AIDS/HIV,” ku iya madah.

Nambahka jaku iya, ku Dr Ngian madah, mensia mayuh enda patut nempiaka sida ke sakit tu diau kediri tang begulai ngembing sida ngelawa pengidup ke meruan.

Program nya kemari diatur beserimbai enggau Hari AIDS Sedunya.