Siku ex-pengari rayat rugi RM8,000 udah ditipu ejen dagang temuai

Utusan Borneo (Sarawak) - - Berita Iban -

SIBU: Siku ex-pengari rayat napi pengerugi RM8,000 sepengudah ditipu ejen dagang temuai ti besemaya ngaduka pejalai iya nemuai ngagai menua tasik.

Sapit Ketuai Polis Pelilih Sibu Martin Koo madah, dulu agi ari tu, ex-pengari rayat, 67, nya bisi nerima telefon ari siku paderi ari gerija di Bintangor madahka penerang bekaul enggau pakej nemuai ngagai menua tasik beserimbai enggau pengawa nyambut ke 100 taun gerija nya.

Ku iya, siku indu, 37, udah nya madahka diri ejen dagang temuai ngaduka pakej nemuai ke Eropah nyengkaum Rome, Italy, Lourdes, France enggau Fatima, Portugal ti beungkus RM12,500 siku.

“Nangkan ke nya, iya enggau bini iya tekait ati enggau rega pakej nya lalu seduai dipinta mayar ngagai akaun bank indu ti madahka diri ejen dagang temuai nya,” ku iya nerang ngagai pengarang berita, kemari.

Kena 9 November tu tadi, ex-pengari rayat nya udah ngirum RM8,000 nengah lumur akaun ke diberi ngagai iya.

Nangkan ke nya, iya nguji betelefon ngagai ejen dagang temuai nya tang enda mujur lalu iya ngaga ripot polis sepengudah ngasaika diri ditipu.

Martin madah, siti ripot polis udah diterima ba Opis Polis Samarahan tang kes nya dibai ngagai Opis Polis Sibu ditu.

“Suspek nipu iya ngirum duit dikena mayar pakej nya ti endang sigi nadai,” ku iya madah baru.

Kes tu ditasat nengah Seksyen 420 Kanun Keseksaan laban nipu.

Newspapers in Malay

Newspapers from Malaysia

© PressReader. All rights reserved.