Sarawak patut bisi portfolio menteri minyak enggau gis

KUCHING: Parti Reformasi Negeri Sarawak (STAR) ngansak Perintah Nengeri ngadaka portfolio menteri minyak enggau gis.

Presiden Lina Soo madah portfolio nya bisi ba tetiap bengkah menua pemansut minyak (OPEC).

Ku iya, Sarawak pan patut bisi portfolio nya ketegal ti nyadi entara menua pemansut minyak ke pemadu besai di dunya.

“Menteri ke mangku tanggungpengawa nya meseti ngembuan peneleba sereta landik ba pekara ke bekait minyak enggau gis.

“Portfolio tu nyaup kitai (Sarawak) ngemansang industri minyak enggau gis,” ku iya ba aum pengarang berita di Kuching kemari.

Soo nambah, menteri nya ulih ngadu kerejasama enggau Petronas ngambika Sarawak diberi agih ke patut ari asil minyak enggau gis.

Iya pechaya mayuh peranak nengeri tu ti ngembuan pengelandik ba minyak enggau gis baka ke sida ti udah gawa enggau Petronas sereta Shell tauka kompeni minyak bukai ke tebilang.

“Menteri tu ila meseti dibantu raban orang ke landik ba pekara ke sama baka ke raban luya enggau akauntan,” ku iya.

Ngenang kaul ke sama, Soo muji pengawa raban pengari rayat ari DAP ti negika tusun merintah ti lurus sereta integriti tinggi.

Ku iya, Pakatan Harapan ( PH) diatu udah megai Perintah Besai lalu ketegal nya ngansak raban pengari rayat ari DAP ngambi tau minta menteri besai man- taika enggau terang akaun Petronas.

Ba aum pengarang berita nya mega, STAR ngansak Perintah Sarawak ngulihka kuasa otonomi ba semua sukut kelimpah ari ba pekara ngenanka menua enggau kaul luar menua.

“Sarawak patut ngulihka kuasa otonomi ba semua sukut lalu ukai semina ba pekara wang enggau imigresen aja.

“Dulu agi ari tu, peranak luar Sarawak meseti ngena passport tama ngagai nengeri tu tang diatu sida semina dipinta ngisi pom penerang aja.

“Jemah ila Sarawak deka ngatika diri alai kitai meseti nyikap diri berengkah diatu. Peranak luar ti deka tama ke nengeri tu meseti ngena passport,” ku iya.