Linda andal TFF ulih nyadi produk ekodagang temuai baru di Lubok Antu
Trigona Family Farm (TFF) iya nya sebengkah produk madu kelulut tulen dipenggi tiga iku indu peranak Rumah Panjai Munggu Jabang, Lubok Antu.
Sida tiga ti ngempu dagang madu kelulut ngena nama TFF tu iya nya Linda Anak Jantin, 28 taun, Jianna Carolus Anak Joim (34) enggau Norina Anak Bunyam (37).
Sida berengkah bejalaika pengawa nginang kelulut tu kena 27 Julai 2018 lalu naka tu penyampau sarang kelulut ke mujur dibuka bisi 79 buah.
Pengawa ngintu kebun madu kelulut nyentuk iya ditepu dalam botol dikereja empat iku orang ti dibayar konterik gaji hari.
Entara pengawa ke suah digaga bala pengereja pengawa tu iya nya ngaga nyimpan enggau masang kaki sarang kelulut.
Lebuh dirandau pemberita nama pemar sekumbang udah ngemeranka dagang madu kelulut tu, dia pengari raban ti ngemeranka dagang tu, Linda madahka sida bisi betapi enggau chara nyual produk madu kelulut enggau pemar nyaga indu kelulut.
Taja betapi enggau pemar nya, sida tiga tetap enda mantul ati lalu seruran ngembuan juluk deka ngerembaika dagang nya.
“Naka tu kami sebuat suah ngelakuka produk TFF nengah pengawa ngulu karninal ( muka bansal), udah nya kami ngelakuka iya nengah media rama baka Facebook ngena nama Trigona Family LJ sereta nengah laman web http://trigonafamilyz.blogspot.com,” ku iya.
Kelimpah nya, kami mega ngelaluka produk TFF nengah pengawa nyiri enggau ngajar bala ejen dagang TFF awakka dagang tu seruran ngerembai ba dalam enggau luar nengeri, ku Linda.
Ngelansa timbal ari mensia mayuh bekaul enggau produk TFF, iya madahka mayuh orang tepantup ati sereta muji penulen produk tu.
“Bekau ari timbal ke chukup manah nya, dia kami mujur bulih untung urung RM50 ari siti sarang kelulut,” ku iya.
Ungkup juluk dagang tu dudi hari, kami arapka TFF terus ngerembai sereta seruran diterima ba makit sekalika nengah chara online tauka diambi terus ari kebun sereta kedai.
“Aku pechaya produk TFF deka terus angkat nyadi produk eko-dagang temuai baru di menua kami di Lubok Antu ditu, laban naka tu mayuh amat orang dagang ari menua bukai baik nya semak tauka jauh datai ensepi penulen madu kelulut kami,” ku Linda nerang enggau penuh pengandal sereta temegahka pengawa dagang tu.
Udah nya, ngenang bantu tauka sukung ari ejensi perintah, TFF ku Linda endang disukung Opis Pengintu Pengelantang Pendiau Raban Bansa (JKM) lalu sida mega kala nemuai ngagai kebun tu beratika chara ngintu sarang kelulut nyentuk baka ni madu iya ditepu dalam botol sebedau ke dijual ngagai pemeli.
Berebak enggau nya, Linda meransang mensia mayuh ke bisi ati ba pengawa dagang madu kelulut meseti ngemeratka sekeda pekara dikumbai 3P iya nya penulen, pemeresi enggau pengeransing.
“Ba dagang madu kelulut tu kami sebuat seruran ngelalau bala pengereja pengawa ti nyaup kami ngemerat sereta ngetanka penulen madu kelulut. Kelimpah nya, pemeresi produk mega meseti dijaga awakka orang (pemeli) seruran milih sereta pechaya ngagai TFF.
“Kelimpah nya pengeransing mega meseti tegap ba genap iku orang ti deka masuk dunya dagang, pemar tetap bisi tang kitai meseti puh napi pemar nya. Anang lembau betanya penemu ari orang bukai ke udah maju ba dunya dagang kelimpah anang amu bekunsi penemu enggau berekat enggau orang bukai. Awakka dagang kitai seruran ngerembai,” ku Linda nerang enggau nyemetak.
Produk madu kelulut TFF udah meruan ditepu dalam botol ti chukup manah bebida pemesai sereta ngundan kuantiti enggau rega nitihka pilih penguna iya nya 50ml dijual enggau rega RM15, 100 ml (RM25), 150 ml (RM35), 200 ml (RM40) enggau ke pemadu besai 1kg (RM150).
Taja agi baru ba dagang tu, tang TFF kala bulih Anugerah Smart Komuniti ba taun 2018 iya nya maya nyereta sebengkah pekit diatur Opis Menteri Kaunsil Kandang Menua enggau Pengawa Berumah Sarawak.
Penerang silik bekaul enggau produk TFF ulih betelefon terus nuju Linda ba lumur 019-2882440, Helmy (013-8484934), Norina (01114049176) enggau Opis (083584013).