JTS Serian naka ulih mantu rayat ti kena pangka projek pemansang
Opis Tanah enggau Survei ( JTS) Pampang Serian naka ulih mantu peranak sitak nya ti kena pangka pejalai projek pemansang perintah.
Penguasa Bagi Menua JTS Serian, Jacqueline George Paou mansutka jaku nya seraya nambah, pekara dikemeratka raban sida iya nya sitak ti kena pangka kuari enggau ngali ti dikemendar ba Bagi Menua Serian.
“Program Tanggungpengawa Rama Korporat ( CSR) ti dipejalaika kitai kemaya hari nengah Inisiatif Transformasyen Menua Pesisir ( RTI) ti meri pemerat ngagai pangka pemansang,” ku iya rambau Program CSR JTS Serian di SJK Pengkalan Bedup, Hari Lima tu tadi.
Pia mega, raban JTS Serian deka nempa pengelantang rama sitak nya ti ngaul projek pemansang perintah ke bisi diatu.
Tu mega ngaul peranak enggau institusyen dia ti kena pangka ba pengidup sida besehari sehari.
Nya kebuah JTS Serian keran gawa ngambika peranak menua nya nerima pemaik ari projek pemansang ke bisi dipejalai ba sitak menua sida.
Kelimpah ari nya, nempa kaul manah antara peranak enggau pedagang industri kuari enggau ngali ti ngaul diri ba operasyen pejalai projek pemansang dia, ku iya nerang baru.
Ku Jacqueline, JTS mega meransang raban pedagang industri mantu ngangkatka tikas idup komuniti dia.
Antara bukai, pedagang industri tau mantu ngemanahka infranstruktur ti udah rusak enggau ke bukai sereta nyendiaka pengawa puang ti patut ngagai peranak, ku iya.
Pedagang industri mega diingat kaul manah enggau peranak menua nya deka ngemuntangka sida bejalaika operasyen enggau nembuka projek dalam timpuh ti udah ditetapka perintah.
Program CSR sekali tu dipejalai ba SJK Pengkalan Bedup ti kena pangka aktiviti kuari ti agi dikereja ditambah pengawa ngaga Jalai Besai Pan Borneo.
Raban JTS Serian udah mantu nempa pemanah rampa sekula sereta mantu ngiga belanja dikena ngaga bilik kelas baru ba sekula nya.
Aktiviti beripai mega dipejalaika raban sida ngambika sekula dipeda rami agi lalu mujur tegigaka belanja penyampau RM5,000 ungkup wang turu PIBG SJK Pengkalan Bedup.