YEWFF dikeandal nyungkak produk dagang temuai di Sibu
Mengeri Sibu ngandalka Year End Wonderful Food Fair ( YEWFF) mujur nyadi siti pengerami nyungkakka agi produk dagang temuai mengeri tu.
Chairman Opis Kaunsil Sibu (SMC) Datuk Tiong Thai King madah, pengerami baka nya bisi pengelebih nyaup mengeri tu matak mayuh agi temuai datai ari menua luar.
“Aku berasai temegah ati laban pengerami tu naka ke diatu ukai semina digulu mensia mayuh ditu aja tang mega digulu temuai ari menua tasik ti bela tekait ati deka ngasaika macham bansa pemakai ditu.
“Tu deka nyungkakka mengeri Sibu nyadi mengeri tebilang enggau bansa pemakai di Malaysia ti deka nempa Sibu dikelala nyentuk renggat antarabansa seraya nyaup ngungkakka industri dagang temuai nengeri Sarawak,” pia ku iya madah.
Iya mantaika jaku tu maya dipebasa bejadi Year End Wonderful Food Fair 2018 ba Dataran Bandar Sibu Fasa II ditu, malam ensana.
Pengerami ti mandangka macham bansa pemakai tu diatur Gerempung Orang Bedaja Sitak Sibu.
Tiong ti mega Kaban Kunsil Nengeri (ADUN) Dudong maya tu bela ngelalau sida ke ngambi bagi ba pengerami semampai beratka pekara pemeresi pemakai ke dijual sida kelimpah netapka rega ti engkeman.
“Besemekih enggau pangan diri nengah chara ke alus laban tu ukai semina pulaika pemaik dagang kita tang meseti nyaga pengelikun orang ke bebeli.
“Barang pemakai ke beresi nentuka pemanah nama mengeri tauka pengerami tu nyentuk ke ila,” ku iya madah baru.
Nambahka jaku iya, Tiong madahka pengerami nya bela besai reti ba pekara ngetanka penyerakup pupu raban bansa mengeri tu.
“Ari penyerakup menua kitai ulih mansang.
“Kebuah pia laban semua barang pemakai ke dijual ba pengerami tu datai ari pupu raban bansa.
“Ari nya, orang menua luar mega ulih meda pengelebih enggau pemanah penyerakup ke dikembuan rayat di mengeri Sibu,” pia ku iya madah.
Sama bela datai maya pengerami tu iya nya Presiden Gerempung Orang Bedaja Sibu, Chiong Siong Nguong.