Pengemeran media patut mantaika berita ti amat
Pengemeran media ba nengeri tu dilalau nentuka tetiap ripot berita ti dikeluar betul enggau belalauka pekara ti amat, nadai limpang ari jerita asal.
Direktor Opis Bomba enggau Penyah Penusah Malaysia (JBPM) Sarawak, Khairudin Drahman madahka mensia mayuh bepanggai ba ripot berita ti dikenataika raban media.
Nya kebuah ripot ti dikeluar patut belalauka pekara nyata lalu ukai jaku aja. Kebuah pia, nyeliah sebarang pekara tau nyadi ti ngasuh orang begau enggau pekara ti dikenggai nyadi.
Ku iya, berindik ari penyampat penerang ngerembai, pengemeran media bejalaika tanggungpengawa besai agi ngulihka penerang ti betul enggau amat.
“Kitai dekaka semua chuan penerang, pekara enggau ari ni pemansut penerang ti ditabur ba berita nya betul lalu ukai semua ba media chelak enggau elektronik aja, tang mega ba media rama,” ku iya rambau Majlis Apresiasi Media Bersama JBPM Sarawak malam kemari.
Khairudin madah bisi mega ‘pengarang berita media rama’ ti betul enggau jampat agi matak berita enggau nadai minta kenuku ari ejensi bekaul.
“Sida tu jampat agi dibida enggau media ‘arus perdana’ tang sida enda nemua sekalika berita ti ditabur nya endang betul enggau amat.
Bebida enggau media arus perdana, sida bejejimat ngeluarka berita lalu penatai berita enggau pekara amat ari ejensi bekaul,” ku iya.
JBPM Sarawak ku iya, bekerejasama rat enggau pengemeran media dikena nentuka ripot pasal penusah ngenyit tauka kes angus dikenatai enggau betul sereta amat.
“Nya kebuah lebuh aku nerima penerang kes, aku mesti ngenuku sekalika penerang nya amat enggau betul sebedau meri ngagai pengarang berita,” ku iya.
Khairudin mega chukup puas ati enggau kerejasama begulai enggau media ba nengeri tu ti dikumbai iya chukup beratka tanggungpengawa ngenataika berita ti betul.
Seraya Kaban Kunsi Nengeri (ADUN) Pujut, Dr Ting Tiong Choon ngelalau pengarang berita ba nenger tu ngarang berita belalauka pugu pekara.
Kebuah pia, mensia mayuh ba luar suah belalauka media arus perdana nentuka pengamat isu ti ditabur nengah laman media rama.
“Aku mega ngarapka berita ari pengemeran media enda bechiping sereta lurus belalauka berita ti amat laban berita sida deka nyadika lalau bala pemacha,” ku iya.
Ting mega nangkan ngambika media enda ngeluarka gambar penusah bebadi ba lambar mua surat berita sida dikena bebasaka sensitivit orang ti sebilik enggau iya t bebadi.
Sama datai Penguasa Kanan Bomba 1, Law Poh Kiong enggau Presiden Serakup Pengarang Berita Wilayah Utara, Andy Jong.