KKWKK seruran bejalaika inisiatif mantu orang tusah
Perintah Nengeri sedia ngemanahka servis ngagai rayat nengah semua pekara ke bisi.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dato Sri Fatimah Abdullah madahka opis menteri iya (KKWKK) seruran bejalaika inisiatif kerejasama strategik enggau ejensi perintah enggau gempung peribit.
“Inisiatif kerejasama strategik tu dikena nyendiaka servis ngagai raban orang ti tusah,” ku iya rambau Program Sejambak Kasih Krismas di Kampung Sungai Ud, Dalat kemari.
Ku iya, kunsi tanggungpengawa antara ejensi begulai enggau opis menteri nyata dipeda sereta chukup manah.
Tu ukai semina dipejalai maya musim hari besai aja, tang mega maya penusah ng- enyit nyadi enggau sebarang maya.
Pia mega bantu sekula enggau Orang Nyelai Pendiau (OKU) enda dikelaung ari raban diselinting ti disebut.
“Kitai enggaika penyeranta nyadika dalih bala anak enda besekula lalu apai indai ti bis anak OKU, sida patut mega diberi awak ngambika gera enggau belajar baka bala anak bukai,” ku iya nerang.
Ngelansa pasal bantu pengelantang, kenyang ar bulan Januari nyentuk Disember 2018, sepenyampau 58,251 iku udah nerima pemaik ari bantu nya, lebih RM209 juta penyampau.
Ari penyampau nya, 4,200 iku penerima ari Bagi Menua Mukah iya nya nerima bantu penyampau RM14 juta.
Berebak enggau program nya, sepenyampau 279 iku penerima pemeri RM100 enggau hamper berega RM50 ti datai ari Kampung Medong enggau Kampung Sunga Ud.
Sida ti enda ulih kimpang ngenataika diri, duit bantu RM100 deka dipasuk ngaga akaun sida.