442 iku pelatih CENTEXS dirami ba pengerami konvokesyen Ke-4
Sepenyampau 442 pelatih ari Palan Kecemerlangan Teknikal Sarawak (CENTEXS) dirami rambau Pengerami Konvokesyen Ke-4 CENTEXS ba Palan Konvensyen Penview (PCC) Demak ditu kemari.
Pengerami nya udah digulu Menteri ba Opis Kepala Menteri ( Integriti enggau Ombudsman) Datuk Talib Zulpilip lalu nyuaka skrol ngagai semua graduet.
Bala graduet datai ari pelatih pengelandik digital enggau teknikal dalam bidang minyak gis, pelabuhan enggau elekterik, pengawa berumah, tekstil enggau hospitaliti sereta dagang digital.
Bejaku ba pengerami nya, Ketuai Pemsai Eksekutif CENTEXS, Syeed Mohd Hussein Wan Abdul Rahman madah kelimpah ari mantu ngemansang enggau ngenegapka modal mensia nengeri enggau pemansut iya, CENTEXS mega ngelaluka semua sida ti bisi penau khas ba bidang digital enggau teknikal seriris enggau juluk besai deka nempa raban bepenau teknologi dudi hari.
“Ari sukung enggau kerejasama tim Kampung Heritage, CENTEXS udah numbuhka bengkel ungkup latih enggau projek inkubator pengelama enam bulan ngagai Sulaman Keringkam enggau Tenunan Songket Sarawak,” ku iya.
Rambau konvokesyen nya, Talib mega nyuaka tanda basa nembiak pemadu nyulut ngagai 15 iku penerima ari tetiap bidang.
Penerima tanda basa nembiak pemadu nyulut iya nya Hansen Agong ( Teknologi Kimpalan 6G Lanjutan), Hendriy Herman (Inspektor Kimpalan 3.0), Clinton Mara Lihan ( Krew Pembinaan Minyak dan Gas),Christopher Lenggang Ngabing (Rigging & Slinging), Timothy Lucas Anyi (Rotating Machinery) enggau Dave Maron Diyah (Static Equipment).
Bela nerima tanda basa nembiak pemadu nyulut CENTEXS, Mohamad Harith Haiqal Hadanan (Wireman Plus), Ahmad Mujahid Fadzli (Chargeman L1), Razid Rosli (Working at Height Operator Level 1.1), Nazziatul Izreen Zainal Abidin ( Teknologi Fesyen Asas), Lyidia Inang (Teknologi Fesyen Lanjutan), Cloudia June Jude Ajan (Hospitaliti- Operasi Hidangan Banquet), Aina Elmira Annuar (Professional Diploma dalam Dandanan Rambutan dan Solekan sereta Sharifah Mordhiah Syeed Hussien (Digital-Pembangunan Aplikasi Telefon Andoroid).
CENTEXS dipungkal ba Kuching dalam bulan Oktober 2014 lalu diatu bisi tiga kampus ba Lundu, Dalat enggau Lawas sereta deka datai ba Betong.
Penerang silik tau ngelawa website CENTEXS di www. centex- sarawak. my tauka telefon nuju 082-846408.