Program Tanggungpengawa Rama Korporat dipejalaika JTS Kapit chukup mujur
Pemangku Superintendent Opis Tanah enggau Survey (JTS) Kapit, Vivilyn Wesley madahka program Tanggungpengawa Rama Korporat (CSR) ba Rumah Lorie, Nanga Ibau, Batang Rajang ditu mujur diatur dua hari berunggu ujung minggu tu tadi beserimbai enggau ngintu genap taun ke-100 opis nya.
“Kami ngintu pengerami tu nengah atur program CSR selampur nengeri lalu tu keterubah JTS ngatur program baka tu ke alai tuju iya nerangka pangku pengawa kami ngagai mensia mayuh seraya mantu komuniti ti dipilih,” ku iya nerang.
Ku iya, raban sida mega berasai lantang meda program udah mujur diatur ke alai ari JTS empu, lebih 50 staf sereta ngaul kesemua komuniti rumah panjai.
“Kami mega bisi ngatur program servis komuniti baka pengawa ngupas lalu muakka lemai, bisi licha pasal pangku pengawa opis kami empu sereta baka ni minta lisin ngauk kerangan enggau pasir ari sungai,” ku iya.
Iya ngena awak nya meri terima kasih ngagai Pelita Sdn Bhd enggau Magna Focus Sdn Bhd ti udah meri Kerejasama rat ngagai JTS ba pengawa ngatur program nya.
Magna Focus Sdn Bhd bisi nyuaka pemeri mata duit enggau ngangkut kerangan enggau pasir ngagai Rumah Lorie dikena mantu ngentak baru rumah panjai sida.
Charles Nyindang ngarika Magna Focus Sdn Bhd enggau Razali Junaidi ti ngarika Pelita Sdn Bhd, Vivilyn Wesley antara lebih 50 iku temuai ke bisi datai ngagai rumah panjai nya.
Bisi 39 pintu bilik Rumah Lorie udah angus lengis kena 21 April 2018 ngujungka nyauka 300 iku peranak dia nadai agi rumah endur diau.
Pengudah rumah panjai nya angus dipelaba ketegal sut tali karan, Komiti Pemansang enggau Pengelikun Genturung Pendiau (JKKK) diatu benung gawa ngelangkar pelin rumah panjai baru ba tanah seberai ti semak enggau Jalai KapitSong.
Pengudah penusah nya mega, 39 pintu bilik nya nadai mindah ke bukai, sida ngupas tanah endur bedampa semak enggau taba rumah panjai lama seraya nganti rumah panjai baru.
Iya madahka program nya aktiviti begulai antara JTS enggau Magna Focus Sdn Bhd enggau Pelita Sdn Bhd.