Helena: Dagang manik seramik Sarawak mayuh pemar tang asil ngemantup ati
Kenyau tiga taun ke udah Helena David Kalum, 46 taun udah ngepunka pejalai diri ba pengawa dagang manik seramik Sarawak ke digaga iya empu.
Sekumbang udah bejalaika dagang tu dia Helena madah, pemar ke balat diasai iya nya enda chukup jam endur nyendika ‘order’ ari pemeli.
“Naka tu pemar ke suah diasai aku enda chukup awak endur nyendiaka ‘order’ bala pemeli diumba enggau tusah deka ngaga perengka baka glaze tauka tarum sereta chuan ti dikerinduka bala pemeli,” ku iya nerang maya dirandau pemberita ditu, apin lama ke udah.
Helena bejalaika pengawa dagang manik seramik Sarawak tu nengah bantu tiga iku pengereja pengawa. Sida tu nyaup iya ngaga chuan manik, ngaga leka manik ngena jari sereta pengawa bukai ke bekaul.
Ngelansa sentang chara ngelakuka produk, dia Helena madah iya suah ngambi bagi nyuwa bansal lebuh bisi pengerami tauka karnival diatur ba kandang menua ke besemak.
“Kelimpah ari nya, aku mega bisi ngelakuka produk aku tu nengah chara online baka Facebook ngena nama aku empu Helena David Kalum enggau Helena Craft Borneo.
“Tebal agi pengawa karnival ke disereta iya nya diatur raban kraftangan, Kaunsil Kraf Sarawak enggau SIRIM,” ku iya.
Pekara ke balat meransang dalam pengawa dagang, endang sebaka enggau orang bukai iya nya untung iya, ku Helena. Sekumbang udah ngemeranka dagang tu untung endang tetap bisi laban seruran nerima timbal ke chukup manah ari bala penguna tauka pemeli.
“Kekadang dalam sebulan bala pemeli sampai dua tiga kali minta digagaka barang ke sebaka, nyadi tu mandangka timbal ke chukup manah ari penguna manik ke ditempa aku empu,” ku Helena seraya tuchum gaga.
Lebuh maya nadai pejalai ke bukai, pengawa nyual produk manik tu semina dijual Helena ba Kota Samarahan.
Juluk Helena dudi hari bekaul enggau dagang tu ngarapka piak bekaul lebih agi ejensi perintah ulih meri bantu baka mesin dikena ngaga manik seramik awakka ulih ngasilka produk ke lebih mayuh sereta bekualiti.
Mensia mayuh ke bisi ati deka meli terus tauka mesan produk manik seramik digaga Helena ulih betelefon nuju lumur 013-8141151.