Semua ketuai, kaban PKR nengeri meseti begempung
Kitai meseti bekerejasama nyadi siti tim lalu meri fokus strategi dikena ngalahka perintah penyakal
“
Semina ari kerejasama enggau begempung aja kitai ulih megai Sarawak
” maya udah PRN ti deka datai.
Baru Bian
Chairman PKR Sarawak
KUCHING: Chairman Parti Keadilan Rakyat ( PKR) Sarawak ti dipilih baru, Baru Bian minta semua ketuai enggau kaban PKR nengeri bekerejasama enggau begempung ngambi teulihka pemujur megai Sarawak maya Pengawa Bepilih Nengeri (PRN) deka datai.
“Nyadi chairman, aku deka minta semua bala ketuai enggau kaban Keadilan ba Sarawak bekerejasama nyadi siti tim sereta begempung gawa enggau meri fokus strategi ngalahka perintah penyakal.
“Semina ari kerejasama enggau begempung aja kitai ulih megai Sarawak maya udah PRN ti deka datai,” ku iya nengah siti penerang berita.
Menteri Kereja Raya madahka diri gagit bekerejasama enggau semua Ketuai PKR Pampang Nengeri ti dipilih, sekalika sida ti baru dipilih tauka dipilih baru.
“Insklusif tauka mungkur semua iya nya kunchi penyerakup enggau pemenang,” ku iya.
Ku Baru, kelebih agi bala ketuai PKR besemaya deka terus ngenegapka penuduk parti nya ba Sarawak lalu tu semina ulih dijapai enti semua raban ulih bekerejasama nyapai juluk sama.
Ku iya, juluk nya iya nya nempa Sarawak meruan agi enggau Malaysia teguh agi nengah Perintah Pakatan Harapan (PH).
“Presiden parti ( Datuk Seri Anwar Ibrahim) udah ngenukuka undi pechaya lalu aku meri besai terima kasih ngagai iya ngagai sukung iya tu.
“Terima kasih mega ngagai bala Ketuai Pampang Sarawak laban meri sukung enggau ngelempaika pengandal nga- gai aku ngetuaika Keadilan Sarawak sepenggal agi.
“Penaluk sida ngelama tu enggau pengawa ditegika kitai begulai ungkup semua peranak Sarawak nyata ngayanka pengeran sida gawaka keadilan menua tu,” ku iya.
Malam Hari Enam tu tadi Kaban Parlimen (MP) Lembah Pantai Fahmi Fadzil ngarika Presiden PKR Datuk Seri Anwar Ibrahim mantaika Baru mujur ngetanka penuduk nyadi Chairman MPN, PKR Sarawak.
Kaban Kunsil Nengeri ( ADUN) Be’ Kalalan nya mujur ngetanka penuduk ti dipegai iya kenyau ari taun 2009, taja bemacham berita ngerimbas pending madahka iya deka disilih.
Fahmi ba sebengkah penerang madahka pemutus nya digaga pengudah aum Anwar enggau bala ketuai pampang nengeri.
“Pangku pengawa bukai deka dibantai udah tu,” ku iya.
Hari Lima tu tadi, Anwar baum enggau bala ketuai pampang PKR berandau enggau milih Chairman MPN Sarawak.
PKR tembu ngatur pengawa bepilih parti dalam pun bulan November.
Pengawa bepilih nya dientudika kongres parti ti keterubah pengudah PKR, nyadi antara parti numbuhka Pakatan Harapan ( PH), mujur numbuhka perintah besai.