Semua projek RTP enggau MRP meseti digaga manah
Kaban Kunsil Nengeri (ADUN) Bukit Goram ngingatka semua kunteriktor Projek Transformasyen Menua Pesisir (RTP) enggau Projek Mit Pemansang Menua Pesisir (MRP) ti diberi projek ngaga pengawa sida memanah nitihka peminta ti udah ditetap.
“Aku ngapil ngagai semua kunteriktor ti udah dipadu gawaka RTP enggau MRP bejalaika pengawa sida memanah nitihka peminta lalu tembu nitihka timpuh ti udah ditetap.
“Aku udah ngagihka projek nitihka peminta ari renggat baruh laban beguna amat projek tu digaga meruan nentuka pengelantang enggau pemaik diasaika rayat ari pengawa dipelanja perintah,” ku iya.
Iya mega ngansak ejensi bejalaika pengawa matau terit projek nitihka Standard of Operation (SOP) laban udah nyadi tanggungpengawa iya ti nyadi pengari rayat nentuka projek dipejalai nitihka pematut.
“Projek tu dipelanja perintah Gabungan Parti Sarawak (GPS) laban perintah nengeri endang siruka pengelantang rayat lalu tu mega tuju kami, nengah projek ngemanahka infrastruktur pemun renggat baruh, beratka pengawa rayat,” ku iya.
Ambika chunto ku iya, ngemanahka sistem bekal ai ti bisi diatu nyilih batang paip besai ti udah lama, tangki ai enggau palan meresi ai, paking kerita beringkat, rampa tebing sungai Kapit, Rampa Panggau Danau, Town Square Redevelopment enggau ke bukai.
Jamit mansutka jaku tu lebuh ngapas projek ngemanahka sistem parit ba mua Balai Mayuh Guna Serakup Foochow Kapit, KM3 Jalai Selirik ditu.
Antara sida ke bisi nyempulang Jamit, Penulung Sekretari Kaunsil Pelilih Kapit, Kelimbit Sibat, bala kunteriktor, chairman Serakup Foochow Kapit Sii Bang Ee sereta bala bukai.
Jamit bisi ba Kapit kenyau ari Hari Lima, ngulu sekeda aktiviti ke bisi diatur nyengkaum bejadika pengawa nutup Pekit Belagu Mandarin Nembiak Sekula Primari enggau Sekondari Renggat Nengeri ti diatur Kaunsil Belagu Sawarak ba Palan Sivik Kapit.
Hari minggu iya udah bejalai ngabas beberapa projek RTP enggau MRP nyengkaum projek ngemanahka sistem parit ba mua Balai Mayuh Guna Serakup Foochow Kapit, KM3 Jalai Selirik, ngupas jalai ti kena tanah tusur ba Gentulong Pelajau 2B, Jalai Bukit Goram, kereja ngaga pengadang tanah tusur enggau sambung jalai ba Rumah Jawang, Taman Yati, Taman Goram Height, Jalai Bukit Goram seraya muakka malam, iya bisi ngulu konsert ti diatur Serakup Artis Iban ba Palan Sivik Kapit.