Pemutus milih Baru Bian nyadi chairman endang udah disadang
Pemutus milih baru Menteri Kereja Raya, Baru Bian nyadi Chairman Kaunsil Ketuai Nengeri (MPN) Parti Keadilan Rakyat (PKR) Sarawak baka ti udah disadang.
Mandal Ketuai Indu PKR Besai madahka semua bela nemua Baru ti mega Kaban Parlimen (MP) Selangau nerima undi majoriti diangkat nyadi Chairman PKR Nengeri laban iya siku tokoh dipebasa ukai semina ba konstituensyen tang mega rayat Sarawak.
“Ba mata tebal agi orang, YB Baru Bian tu siku nasionalism enggau seruran bisi juluk ti manah sereta ngereja sebarang pangku pengawa ti dilempaika rayat taja ngena chara ti enda dikelala dikena nyapai tuju nya.
“Chara ti dipalik ukai chara iya gawa, baka ti dikereja tebal agi kaban politik,” ku iya.
Voon ti mega Mandal Ketuai PKR Pampang Stampin madahka Baru nyadi siku ketuai ti tegap penemu enggau lurus gawaka pengawa ditegika iya ungkup peranak Sarawak.
“Nya kebuah besai kami milih iya baru nyadi juragan ngemudika kapal kami ba Sarawak,” ku iya.
Ba lansa bukai, Ketuai Indu PKR Sarawak, Nurhanim Mokhsen madahka Sayap Indu PKR Nengeri deka nyukung 100 peratus pengawa milih baru Baru nyadi Chairman PKR Sarawak.
“Kami deka meri kerejasama tegut ngagai YB Baru lalu kami deka nampung kaul kerejasama rat pulaika pemaik parti enggau Sarawak,” ku iya.
Nitih ku Nurhanim, peranak Sarawak milih Baru laban pechaya sereta andalka pengawa iya megai rayat.
“Kami andalka YB Baru ulih lurus gawaka Sarawak dataika tikas nyulut agi ari diatu. Tu mega nunjukka YB Baru bisi pengaruh kuat dalam MPN Sarawak.
“Majoriti pampang nyukung iya. Ba Sarawak, kitai bisi 29 pampang diatu, pengawa bepilih ba dua pampang dilanjar ketegal penanggul teknikal,” ku iya.
Malam Hari Enam tu tadi, MP Lembah Pantai Fahmi Fadzil ngarika Presiden PKR Datuk Seri Anwar Ibrahim mantaika Baru, tetap nyadi Chairman PKR Sarawak.
Menteri Kereja Raya mujur ngetanka pangku pengawa ti dipegai iya kenyau ari November 2009, taja bisi mayuh jerita ngerimbas pending madahka iya deka disilih.
Fahmi ba sebengkah penerang madahka pemutus nya digaga pengudah aum Anwar begulai enggau bala ketuai pampang nengeri.
“Pangku pengawa bukai deka dibantai udah tu,” ku iya.