Snowdan meransang semua kelab lumba rejister ba KBS

Semua kelab tauka gerempung lumba ti apin rejista enggau Opis Menteri Nembiak enggau Lumba Nengeri Sarawak (KBS) patut rejista ngambi muntang agi pengawa ngatur enggau meri geran ninting taun.

Menteri Nembiak enggau Lumba, Datuk Snowdan Lawan madahka raban sida endang meransang kelab tauka gempung lumba rejista ba Pesuruhjaya Sukan Negeri Sarawak.

Kenu ku iya, bisi beberapa chara minta rejista gempung lumba ti tau dikena iya nya rejista chara online nengah Sistem Pendaftaran Badan Sukan (ROSA).

“Rejista mega tau ngena pom peminta diambi ari Pejabat Pesuruhjaya Sukan sebedau nganjung peminta rejista kelab tauka gempung lumba,” ku iya lebuh bejadika Karnival Hobi Belia Serembu ba Pekan Siniawan Lama ditu, kemari.

Berebak enggau nya, ku Snowdan, perintah nengeri seruran berundingka chara ti engkeman ngaul raban nembiak ba nengeri tu.

Ku iya, chara ti engkeman patut dipejalai ngambika raban nembiak bisi awak pemadu manah mantaika penau sida empu.

“Kitai ngaku jeman udah berubah ke alai realiti raban nembiak kemaya hari mega berubah iya nya sida rindu mantaika asai ati ngena chara sida empu.

“Tu siti ari gaya rebak nembiak ti usah dikaul enggau kreativiti, inovasi enggau dinamik,” ku iya.

Ba pengerami sama, Snowdan mega bisi ngemendarka geran sepenyampau RM10,000 dikena ngatur karnival nya.

Seraya Kaban Kunsil Nengeri Serembu, Miro Simuh madahka pengawa dikemeran raban nembiak belalauka pengawa ti dikerindu sida maya lepa, nadai entu nitihka atur enggau protokol.

Ku iya, peminta raban nembiak baka tu ti patut diperati memanah semua raban kelebih agi perintah nengeri.

“Nengah kaul sida ba aktiviti baka tu, raban nembiak ulih nempa kualiti enggau penempa ulah diri empu.

“Tu mih ubah nyata ba pengawa raban nembiak kemaya hari maya sida diperati enggai nitihka aktiviti kelalu formal enggau konvensional,” ku iya.