Atur zon nginsap di restoran, kedai makai diterima manah
Atur penginsap patut nginsap abis nadai penyauh tiga meter ari premis lebuh atur nagang nginsap ba restoran enggau kedai makai berengkah dipejalaika tauka diteritka 1 Januari 2019, nerima sukung manah ari mensia mayuh.
Tebal agi orang ke dikerandau Utusan Borneo nyengkaum penginsap, mega setuju atur nya dipejalai sereta diteritka laban ti ngira pengerai orang bukai ke enda nginsap.
Bisi mega bepenemu, atur ke deka dipejalaika perintah nya ulih mujur enti mensia mayuh kelebih agi raban penginsap meri kerejasama sereta kimpin penyedar pasal penyai nginsap enggau asap insap ngagai pengerai orang bukai ulih chakah dipejalaika.
Polycarp Danson, 43, madahka atur nagang nginsap ba restoran sereta kedai makai chukup manah sereta patut dipejalaika laban nya ulih nyeliahka orang ke enda nginsap ari kena tepuk asap insap laban asap nya ulih ngeruga pengerai nyengkaum ba anak mit.
“Ba penemu aku, pemutus ngemendarka zon nginsap penyauh tiga meter ari restoran enggau kedai makai bisi pematut, asal ukai dalam restoran enggau kedai makai.
“Kitai ngarapka chara ti deka dipejalaika perintah nerima kerejasama ari bala pengisap. Laban tuju perintah kebendar deka mantu nyaga enggau ngangkatka pengerai mensia mayuh.
“Enti atur tu dipejalaika enggau betul, bala penginsap engka ulih nitihka atur tauka meri kerejasama. Sida mega mensia lalu tambah mega siku ari raban ke enda nginsap nya mega engka sida sebilik,” ku iya.
Polycarp bepenemu dikena nentuka atur nya mujur piak perintah tauka bekaul patut ngelekatka papan tanda nagang nginsap ba pintu penama sereta endur ke ulih dipeda kelimpah ari kaunter nyual insap diengkah ba endur bukai.
“Raban penerit adat ti bekaul patut chakah sereta terit bejalaika pengawa meresa ngagai premis tauka restoran enggau ke dai makai.
“Opis ke bekaul enggau ulih ngelancharka program tauka diskaun chukai asil ngagai premis ti ngenukuka premis sida 100 peratus nadai insap,” ku iya ti gawa nyadi Sapit Injinir (construction) ba Rajawali SB.
Nambahka nya Sang San- jan, 39, ti gawa ba Gerempung Kayu Ramu Sarawak (STA) mega sepenemu madahka atur nya endang patut laban bisi mai pemanah enti enda nginsap ba endur mensia mayuh baka restoran enggau kedai makai.
Ba iya empu ku Sang, maya makai enti ditepuk asap insap endang enda nyamai sereta kelimpah ari baka ke ditemu asap insap ulih ngeruga pengerai.
Iya bepenemu atur nya ulih mujur enti penginsap ulih meri kerejasama ngagai atur ke dipejalaika perintah kelimpah ari perintah patut nyendiaka endur ke patut ulih alai nginsap.
“Penginsap ulih belatih enggau belelubah (enda nginsap ba endur ke ditagang). Segi pedis mih deka neleba diri enda nginsap ba endur ke ditagang.
“Baka aku empu, aku endang enda nginsap dalam rumah. Ambika chunto kandang endur sepital ditagang nginsap, tang ari latih enggau neleba diri, kitai ulih enda nginsap,” ku Sang seraya bepenemu perintah patut chakah ngatur kimpin pasal pekara tu dikena nyendarka mensia mayuh.
Kelimpah ari nya, Korina Mang, nyambut manah atur baru ti bebendar nguji deka ngajar penginsap ngambika bebasaka orang ti enda nginsap.
Taja pia iya bepenemu, atur nya patut diteritka ulih raban penerit laban enda ngira ni pemanah undang- undang tauka atur ke deka dipejalaika enti (raban penerit adat tauka undang) enda terit, pekara nya tetap enda mujur.
“Aku nyambut manah atur baru tu ti enggau bebendar amat deka nguji ngajar penginsap ngambika bebasaka orang bukai ti enda nginsap.
“Ba runding aku atur tu ukai patut semina ditetapka ba sida ke nginsap insap tang mega nyengkaum ke ngena vape, kelimpah ari bejalaika mayuh kimpin pengerai bekaul engga pekara nama penyadi ba orang ke enda insap laban asap insap sereta ba penginsap empu,” ku iya.