Program penyedar pasal insap patut diajar ari renggat sekula
Opis Menteri Pengerai Malaysia ( KKM) patut mekuh ngagai pengawa ngajar raban bansa baka berengkah ari renggat sekula.
Mani Jack, beumur urung 40, bepenemu program ngajar tauka penyedar ba sekula patut chakah dipejalaika laban diatu ulih dipeda nembiak nginsap dalam agu sereta mayuh papung insap dibuai sebarang.
Iya mega bepenemu, KKM patut bisi chara bukai kelimpah ari terus ngukum penginsap sereta netapka penyauh ulih endur nginsap ari restoran enggau kedai makai.
“(Ba penemu aku)Nama ke patut opis menteri pengerai patut mekuh ngagai program nagang tauka penyedar ti berengkah dipejalaika ba sekula.
“(KKM)Tau mega bejalaika program ti mekuh ngagai program pengerai ke ulih mai penginsap ngurangka ulah nginsap kelimpah ari baka ngelalau sereta madahka nama pemakai ke patut diempa baka supplimen ti ulih nulung ngurangka empas sereta ulah nginsap.
“Iklan minta penginsap bebasaka orang indu ngandung mega patut dipejalaika lebih agi ba kedai kopi ambika chunto,” ku iya seraya madah ngagai Utusan Borneo piak bekaul ukai patut lalu terus ngukum penginsap.
Bepelasarka ripot Bernama di Kuala Lumpur, Sapit Menteri Pengerai Dr Kee Boon Chye madahka penginsap patut nginsap abis nadai tiga meter penyauh ari premis, lebuh atur nagang ngisap ba restoran enggau kedai makai berengkah dipejalaika kena 1 Januari 2019 tauka tau ditinggang ukum.
Dr Lee madahka atur ke diterit nya semina mungkur atur meri jaku tangkan enggau pelajar dalam enam bulan keretubah dipejalaika ila.
“Atur ke diterit nya deka dipejalaika penulung pemesai pengerai kandang ngelingi. Nyadi ba renggat opis menteri bisi 5,008 iku orang ke bisi kuasa neritaka atur nya ba endur ke ditagang alai nginsap,” ku iya ba aum pengarang berita di Parlimen ensanus.
Lebuh dipinta bekaul enggau atur ke deka dipejalaika Opis Menteri pengerai (KKM) taun baru nya, Martin Saba Chan, 34, madahka diri nyukung sereta atur ke manah dipejalaika.
Endang patut perintah ngaga atur nya awakka kandang endur kitai nadai insap, ku iya.
“Ambika chunto ba endur ke tebuka, chukup mayuh bala penginsap ke lalu nadai ngira orang bukai ngelingi.
“Nengah atur tu dipejalaika ila, abis nadai kitai ulih ngaga dua pekara iya nya nyaga pemeresi angin ari asap insap sereta kedua ulih nyeliahka ari papung insap dibuai sebarang. Ngena chara tu kitai ulih nyaga rampa menua,” ku iya madah ngagai Utusan Borneo, kemari.
Iya ti gawa ba Sepital Sibu bepenemu endang patut disediaka siti endur ngisap khas ke jauh mimit ari tugung mensia mayuh.
Kelimpah ari nya, Mageline Pidang Anye, 36 mega sepenemu madahka diri setuju enggau atur perintah nya.
Mageline madahka ulah sekeda orang ti nginsap ba kedai makai lalu enda bebasaka orang bukai ke enda nginsap, endang enda ngelantang ati.
Iya madahka penginsap ke nginsap ba endur mensia mayuh ulih ngeruga pengerai orang bukai lebih agi anak mit, orang tuai sereta orang ti enda bepengerai.
“Atur nya endang patut dipejalaika perintah, kemeran sereta kemeratka undang-undang ke ulih nagang penginsap ba nginsap ba kandang endur ke dilawa mensia mayuh,” ku iya siku ari pengereja pengawa ba Sepital Sibu.