Jamit udah ngawakka diri ngabas projek pemansang ti digaga ba sitak Bukit Goram
Baka selama, Kaban Kunsil Nengeri ( ADUN) Bukit Goram, Jefferson Jamit Unyat dipeda ngatur pejalai ngabas sitak menua dipegai iya enggau ngabas sekeda kereja dipejalai ba Projek Mit Pemansang Menua Pesisir (MRP) enggau Program Transformasyen Menua Pesisir (RTP).
Projek tu udah diberi ngagai bala kunteriktor apin lama ke udah lalu sekeda projek mega dipejalaika Kaunsil Pelilih Kapit (KDC), seraya ke bukai dipejalaika Opis Residen tauka Opis Kereja Raya (JKR) Bagi Menua Kapit.
Jamit bisi ngabas pengawa ngaga parit ba mua Balai Mayuhguna Serakup Foochow Kapit ba KM3, Jalai Selirik, nampung pejalai ngelawa Genturung Pelajau 2B ngabas pengawa muai tanah tusur ti nekul jalai, ngenusah urung 20 ruang bilik sereta ngabas pengawa ngaga jalai semin enggau dinding penekat ba Rumah Jawang, Taman Yati, KM3 Jalai Bukit Goram sereta mega pengawa sementara nagang tanah tekerap ba KM3 Jalai Bukit Goram.
“Rumah ba Taman Yati sempil amat enggau pangan diri sereta sekut. Pulaika pengelantang ngagai urung 20 ruang bilik, aku merambu jalai semin digaga ari simpang ba Jalai Bukit Goram ti nyam- bung ngagai tetiap rumah.
“Pia mega pengawa ngaga dinding penekat ba tebiang dikena nagang tanah tusur. Ketegal kelalu sempil, nadai jalai ti meruan, nya kebuah, jalai tu ila deka nyendiaka jalai ti meruan ngagai sida ke diau ditu, jauh ari tisi jalai. Sida ulih mai entukar diri empu ngelawa rumah ari ke paking ba tisi jalai. Projek RTP tu beungkus RM150,000 dikena ngaga jalai semin enggau dinding penekat,” ku Jamit.
Nyempulang Jamit iya nya Kaunsilor Liew Hui Hua, Pemantu Jamit, Douglas Jamit enggau Cocham Alwi.
Iya madah ngagai pengarang berita ke alai Perintah GPS ngagihka belanja dikena bejalaika projek MRP enggau RTP.
“Projek MRP enggau RTP tu dipelanja Perintah GPS lalu mai pemaik ngagai rayat. Aku udah nentuka randau enggau kunteriktor ke alai sida deka ngereja pengawa enggau manah. Semua projek tu nguntungka peranak renggat baruh,” ku Jamit nambah.