PBT diansak ngemeranka runding, chara kereja baru
Raban Kaunsil Kandang Menua (PBT) di nengeri tu diansak ngemeranka runding enggau chara kereja baru seriris enggau bemacham pemar ti ditapi kemaya hari.
Menteri Muda Kaunsil Kandang Menua, Datu Dr. Penguang Manggil madahka PBT badu agi ngembuan runding enggau chara kereja lama iya nya ‘bejalaika sebarang pengawa nitihka peneka kitai’.
PBT ba Sarawak ku iya madah nyemetak, patut ngubah runding enggau chara kereja ngagai ‘ bejalaika sebarang pengawa ti dikedeka ke rayat’.
“Udah datai ba maya ungkup PBT ukai semina ngemeratka pengawa meresi enggau ngumpul uras aja tang menggi pangku pengawa matak pemeranak puku dalam enggau luar kandang menua PBT dikena nambahka penatai pemisi.
“Tu beguna amat laban PBT enda ulih seruran bepanggai ngagai perintah enggau perintah besai ngulihka pemansut belanja,” ku iya.
Iya mansutka jaku nya lebuh bejaku ba Pengerami Makai Lemai Ninting Taun enggau Mantar Krismas 2018 diatur Kaunsil Pelilih Bau (MDB), ba Balai Suarah Bau ditu, malam kemari.
Penguang madahka PBT mega patut nentuka penyikar raban ngatur pekara wang sida empu sereta seruran bebendar gawa ngiga pun penatai pemisi baru.
Tu mega ku iya, PBT ulih bejalaika projek tauka program ti meri pemaik ngagai peranak ba sitak dipegai sida.
“Ari pemisi sistem ngatur pengawa PBT ti berurun, deka ngasuh sebana enggau servis ungkup rayat ulih dipejalai enggau sikar sereta meruan agi.
“Nya kebuah aku meransang raban kereja MDB seruran ngemeratka pekara besai ti patut diperati iya nya nentuka kenatai servis efektif sereta efisien,” ku iya.
Berebak engga nya, iya mantaika pengandal ke ala MDM di baruh pegai Simon Wong deka ngelanggur pelin strategik ti ulih nempa tunga kuing pejalai udah tu.
Pekara tu beguna amat ngambika semua bansa servis kaunsil ti disedia ulih mer pengidup lantang agi ngaga peranak, ku iya nambah.
Sama datai Kaban Kunsi Nengeri (ADUN) Tasik Biru Dato Henry Harry Jinep ADUN Opar Ranum Mina ADUN Serembu Miro Simuh ADUN Batu Kitang ti mega Chairman Majlis Perbandaran Padawan, Lo Khere Chiang Chairman Majlis Perbandaran Kota Samarahan, Datuk Peter Minos enggau Chairman MDB, Simon Wong.