Dua palan servis ungkup raban orang lunggar umur ditumbuh Bintulu, Tatau
Ba pengawa ngangkatka tikas idup orang tuai ditu, perintah nengeri Opis Pengintu Pengelantang Mensia Mayuh ( JKM) udah numbuhka dua palan servis ungkup raban orang lunggar umur di Bintulu enggau Tatau.
Pemesai JKM Bintulu, Taddy Ajin madahka batang tuju palan servis tu iya nya nyendiaka pelasar ngagai sida ngaul diri ba aktiviti bepengerai enggau meruan regas sereta gawaka komuniti.
“Kitai enggai nejuka raban orang tuai semina idup dalam dunya sida empu laban sunyi tu tau ngasuh penanggul bukai datai baka kusut runding.
“JKM udah bejalaika mayuh macham inisiatif taun tu dikena ngangkatka tikas pengidup sida, ambika chuntosenior citizen got talent enggau chair fitness programmes,” ku Taddy rambau Pengerami Makai Lemai Ngenang Jasa JKM Bintulu ba sebuah hotel ditu, malam Hari Satu tu tadi.
Nitih ku iya, JKM Bintulu bisi sepenyampau 1,093 iku nerima pemaik naka Disember 2018 ti ngaul bantu penyampau RM4.6 juta ngagai orang tuai lalu naka ulih ngetanka potensil sida, JKM naka ulih ngaul sida dalam aktiviti dalam komuniti sida empu.
“Dikena nentu gawak raban ditagit kitai meruan agi, raban volunteer ngintu pengelantang kitai mega patut kering agi. Opis kitai bisi mayuh volunteer ti regas gawa, ti nyata ngayanka pengeran tinggi enggau rindu amat mantu opis ngelama tu.
“Ba pekara tu ngarika JKM Bintulu, aku deka meri puji ngagai semua raban volunteer ti udah nyaup kitai sereta gawaka komuniti sereta nadai minta balas,” ku Taddy.
Ku iya, raban volunteer tu nyadi bujang berani ti enda beberita laban sida enda dikelala dalam komuniti tang agi naka ulih gawa, ambika chunto ba servis mantu ba rumah, ngaul diri ba pengawa mutarka penusah ngenyit, mantu komuniti bepelasarka aktiviti enggau ke bukai.
Taddy madahka JKM ngelala pengawa sida lalu nya kebuah Gempung Raban Volunteer Pengintu Pengelantang Bintulu ditumbuh.
Iya ngarap ari gempung tu, raban volunteer ulih ngatur pengawa berurun enggau meruan agi lalu berebak enggau nya nyaup perintah ngagihka bantu enggau agih belanja nitihka pematut.
“Ari pemansut belanja, aku pechaya tu ulih mantu sida bejalaika kereja volunteer meruan agi sereta nyendiaka sukung rama ngagai raban ti begunaka bantu kelebih agi di Bintulu,” ku iya nambah.