17 palan di Sarawak suah endur penusah bebadi jalai alun
Raban penerit adat kelebih agi polis deka mekuh ngagai semua endur nya dikena ngurangka agi kes bebadi
SIBU: Sepenyampau 17 bengkah endur ba nengeri tu udah ditentuka suah alai penusah bebadi jalai alun nyadi kenyau ari taun 2016 nyentuk ke diatu.
Pesuruhjaya Polis Sarawak Dato Azman Yusof madah, raban sida deka lebih agi ngemeratka pengawa matau ba semua endur tu dikena ngurangka agi kes nyadi.
“Ba ditu kitai deka nganjung raban kami dikena nentuka bala ti betengahka jalai alun semampai bejejaga tauka nitihka atur jalai alun.
“Kitai ukai kelalu neritka atur tang kitai deka meda mensia mayuh likun,” pia ku iya madah maya aum media sepengudah bejadika OP Selamat Beserimbai enggau Hari Krismas 2018 ditu, kemari.
Azman mega madah, penyampau kes jalai alun dalam timpuh Januari- November 2017 enggau timpuh ke sebaka taun tu niki sepan-
“
Ba ditu kitai deka nganjung raban kami dikena nentuka bala ti betengahka jalai alun semampai bejejaga tauka nitihka atur
” jalai alun.
Dato Azman Yusof
Pesuruhjaya Polis Sarawak
yampau 600 kes.
Ku iya, ba 2017 bisi 18,180 iti kes niki ngagai 18,780 iti taun tu.
“Tang taja pan baka nya, kes nabanka nyawa nurun 13.3 peratus iya nya ari 345 (2017) nurun ngagai 299 kes ba taun tu.
“Penyampau kes balat bakal bela nurun 19 iti kes tauka nurun 9.4 peratus ari 202 kes ngagai 183 iti kes.
“Iya ke niki iya nya kes ti bekaul enggau perengka pengangkut jai iya nya ba 2017 bisi 17, 376 iti kes enti dibida enggau 18,128 kes ba 2018 tauka nambah ngagai 752 iti kes,” ku iya nimbal tanya.
Berindik ari nya Azman ngelalau mensia mayuh semampai betatika pengelikun diri maya ti nengah jalai Pan Borneo ti benung digaga maya tu.
“Tau belubah nengah sepemanjai jalai tu laban agi empai manah baka nyangka bisi belubang, batu ti mega tau bendar ngujungka penusah jalai alun nyadi,” pia ku iya madah baru.
Kelimpah ari nya, iya mega madah, sida ti bejalaika ekspres meseti nentuka pengelikun orang ti nepan sida seraya nitihka atur ti udah ditetapka.
“Di Sarawak, perengka pengangkut sungai agi dikemeranka lebih agi musin pengerami.
“Kitai enggai meda penusah nyadi maya kitai terit nirika atur nyengkaum ba sungai,” ku iya madah.
Bekaul enggau OP Selamat Beserimbai enggau Hari Krismas 2018, Azman madah, rambai jaku taun tu iya nya ‘Rumah Selamat, Selamat Sampai Ke Destinasi ti diatur 18 Disember 2018 nyentuk 1 Januari 2019.
“Batang tuju kitai iya nya ngembing mensia mayuh semampai nitihka atur jala alun enggau pekara ti bekau enggau pengelikun keresa premis enggau rumah.
“Sida ti deka pulai ke menua maya Krismas tu dilalau nemu nama patut digaga sebedau sida mupuk.
“Ambika banding baka bepadah ngagai orang sepiak tauka ngisi pom ( Borang Maklumat Balik Kampung) ba Opis Polis tauka peda nengah laman web Polis Diraja Malaysia,” ku iya ngelalau.
Sama bela datai maya pengawa tu iya nya Menter Dagang Antarabansa enggau E- Dagang Dato Sr Wong Song Koh, Ketua Opis Polis Sibu ACP Stanley Jonathan Ringgit, Kaban Kunsil Nengeri ( ADUN) Dudong Datuk Tiong Tha King enggau ADUN Pelawan David Wong.