Peranak Rh Sandau dipindah ke palan ngenduh enda lama sepengudah dituntung penusah tanah tusur
Tebal agi peranak Rumah Sandau ba Sungai Mapai, Kanowit, diatu deka dipindah ngagai palan ngenduh enda lama pengudah sebagi ari rumah panjai sida runtuh ba penusah tanah tusur kena tengahari Hari Lima tu tadi.
Raban Bomba Kanowit kemari ngenukuka pekara tu, madah taja sida semina dipadah pasal penusah nya kena Hari Satu, tiga hari pengudah tanah tusur, sida berumban ngesah kia beratika gaya penusah ti nuntung 14 pintu bilik rumah panjai nya.
Siku pengari madah semina bilik ari dua ruang bilik ba pintu lumur 13 enggau 14 aja selamat.
“Sida ke diau ari pintu bilik lumur 5 ngagai 12 kena empas penusah nya seraya dapur pintu bilik lumur 8 enggau 9 runtuh sereta ditabanka tanah tusur.”
Penusah nyadi kena Hari Lima nyin tadi lebuh tanah tusur pengudah beberapa hari ujan bangat.
Nasit amat nadai penusah bebadi nyawa bisi diripot nyadi.
Peranak dulu agi nganjung ‘isyarat SOS’ sida, lalu kaban Parti Keadilan Rakyat (PKR) Satu Anchom bisi ngesah peranak dia.
Satu Anchom, ti mega chalun minta pilih ba sitak P.210 Kanowit rambau pengawa bepilih besai bulan Mei nyin tadi madahka peranak ti tasah diatu begunaka bantu.
Iya ngarapka raban bekaul deka jampat nganjung bantu ngagai sida.
Iya nangika gaya penusah majak balat enti ujan majak bangat.
“Nyangka tau ngasuh mayuh agi stuktur rumah panjai runtuh enti tanah majak tusur ila.”