PMSB dikeandal numbuhka institusyen bekaul kus gawa ke tasik di Tanjung Manis

Pelita Maslaut Sdn Bhd (PMSB) dikeandal ulih numbuhka sebuah institusyen bekaul enggau kus pengawa gawa di tasik ba Tanjung Manis dudi hari ila.

Menteri Muda ba Opis Kepala Menteri (Korporat) Abdullah Saidol madah, perambu tu seriris enggau pengingin ati deka meda nembiak menua tu nyadi orang gawa di tasik.

“Perintah nengeri deka meri kerejasama ngagai PMSB enti sida deka ngaga institusyen tu di Tanjung Manis kelimpah endang udah deka ngaga sebuah di Miri,” pia ku iya madah.

Iya mantaika jaku tu maya bejadi pengerami ‘ Passing Out Marine Enginering Rating and Marine Engineering Officer’ di Dewan Kompleks Islam Sarawak ditu, kemari.

Maya tu iya nyuaka setipikit ngagai 18 iku nembiak PMSB ‘Marine Engineering Rating’ enggau tujuh iku nembiak ‘Officer Incharge of Engineering Watch >750kW’.

Kelimpah ari nya, iya ti mega Kaban Kunsil Nengeri (ADUN) Semop madahka iya besetuju enggau Manijer Besai PMSB Mohamad Nazim Masni ti minta kus bekaul enggau pengawa gawa di tasik diberi ngagai orang berikan nengeri tu.

“Kitai bela deka meda orang ke berikan nengeri tu ngembuan pengelandik ukai semina deka nambahka penyampau orang gawa ke tasik ba kapal besai aja,” ku iya madah baru.

Dulu agi ari tu, Abdullah ba jaku iya mantaika pengaga at ngagai PMSB ti udah mujur bulih ‘ Anugerah Institus Maritim Yang Terbaik Malaysia’ ba taun 2017 beserimbai enggau ‘Hari Pelaut Sedunia 2017’ di KLCC.

“Ngarapka PMSB semampai deka bulih pemujur nangkan ke tu lalu nempa mayuh agi nembiak ti landik ba pengawa gawa ke tasik ar nengeri tu,” ku iya madah.

Sama bela datai maya tu iya nya Direktor PMSB Masn Amit.