Jalai pengarap nadai ngajar ngasuh jai enggau pangan diri
Nadai siti pan jalai pengarap di dunya ngajar orang ke nitihka (pengarap) begedi sereta bemunsuh enggau pangan diri.
Menteri Muda Pemansang Dagang Mit enggau Tengan Pemesai (PKS) Datuk Mohd Naroden Majais madah, tetiap jalai pengarap beratka orang ke nitihka (jalai pengarap) idup dalam pemaik enggau pengelantang sereta bebasaka pangan diri.
“Jalai pengarap ukai dikena mambarka peranak kelebih agi di kandang menua Gedong tu, tang ngajar kitai ngambika ngereja pengawa ti manah sereta bebasaka pangan diri.
“Taja pan enda sama jalai pengarap, tetiap jalai pengarap bisi siti pekara ti sama iya nya minta tetiap iku ti nitihka jalai pengarap nya ulih gaga ke pemaik enggau pengelantang.
“Kitai, kelebih agi di Sarawak berasai untung laban ulih nerima penemu tauka jalai pengarap orang bukai taja pan mayuh bansa enggau etnik sereta jalai pengarap, lalu tu ukai semina ulih ngasuh kitai idup dalam pengelantang, tang kitai sama ulih ngerami enda ngira nama bagi pengerami,” ku iya ti mega Menteri Muda E-dagang.
Naroden ti mega Kaban Kunsil Nengeri ( ADUN) Gedong mansutka pekara nya lebuh ke bejaku ba pengerami Mantar Krismas ke diatur ba Rumah Panjai Tr Roport ba Kampung Munggu Sabun Ulu Simunjan, malam ensanus.
Berebak enggau tu iya ngelalau rayat ngambika seruran temegah ke pemaik enggau pengelantang ti dikembuan nengah pengawa bebasaka pangan diri awakka pengasa asai diri sebilik ba Sarawak ulih ditanka.
“Selamat Hari Krismas lalu ngarapka maya Hari Krismas tu kitai sama bulih pengerai idup dalam pemaik enggau pengelantang,” ku iya.
Naroden ba pengerami nya bisi nyuaka pemeri sepenyampau RM60,000 ngagai 20 buah gerija ba kandang menua Ulu Simunjan, dikena bejalaika aktiviti jalai pengarap.